Վրաստանի խորհրդարանի արտաքին հարաբերությունների հանձնաժողովի նախագահի առաջին տեղակալ Մարիամ Լաշխին մարտի 10-12-ը Նյու Յորքում ՄԱԿ-ի կենտրոնակայանում մասնակցել է ՄԱԿ-ի Կանանց կարգավիճակի հանձնաժողովի (CSW) 69-րդ նստաշրջանին և Միջխորհրդարանական միության (IPU) ամենամյա խորհրդարանական հանդիպմանը։

Միջխորհրդարանական միության հանդիպման հիմնական թեման էր՝ «Խորհրդարանները և Պեկինի հռչակագիրը 30 տարի անց. դիմադրության հաղթահարում և գենդերային հավասարության համար գոյություն ունեցող պարադիգմների օգտագործումը»:

Պատգամավորը, դիմելով պատվիրակներին, խոսեց Վրաստանում կանանց հզորացման կարևորության, ինչպես նաև Պեկինի հռչակագրում և Գործողությունների պլատֆորմում ամրագրված պարտավորությունների կատարման առաջընթացի և մարտահրավերների մասին:

«Վրաստանն ունի կանանց քաղաքական մասնակցության ակնառու ժառանգություն, որը սկիզբ է առնում 1918 թվականից, երբ մենք առաջին երկրներից էինք, որ ընտրեցինք կանանց խորհրդարանում: Այս առաջադեմ ավանդույթը մեր ազգային ինքնության մաս է կազմում, թեև դրա պահպանման հարցում մենք բախվել ենք բազմաթիվ մարտահրավերների: Վրաստանը զգալի առաջընթաց է գրանցել Պեկինի հռչակագրի և Գործողությունների պլատֆորմի իրականացման հարցում, մասնավորապես կրթության հասանելիության և STEAM ոլորտներում աղջիկների և կանանց ներգրավվածության մեծացման առումով: Նպատակային կրթական ծրագրերի և պետական-մասնավոր համագործակցության միջոցով մենք տեսնում ենք տեխնոլոգիական ոլորտներում կարիերա ընտրող կանանց տպավորիչ աճ», – ասել է Մարիամ Լաշխին:

Պատգամավորն իր ելույթում Միջխորհրդարանական միության (IPU) անդամներին կոչ արեց միասին աշխատել կանանց իրավունքների ամրապնդման ուղղությամբ։

«Եկեք միավորենք ուժերը՝ ստեղծելու օրենսդրություն, որը կապահովի կանանց լիարժեք մասնակցությունը հասարակական կյանքի բոլոր ոլորտներում և ստեղծենք այն խաղաղ ու արդար հասարակությունները, որոնց արժանի են մեր քաղաքացիները»,- ասել է Մարիամ Լաշխին։

Այս մասին հայտնում է Վրաստանի խորհրդարանի մամուլի ծառայությունը։