Վրաստանի էկոնոմիկայի նախարար Մարիամ Քվրիվիշվիլին հանդիպել է Ադրբեջանի նախագահ Իլհամ Ալիևի հետ։ Այս մասին հայտնել են ադրբեջանական լրատվամիջոցները։

Ըստ նրանց՝ Իլհամ Ալիևը շնորհավորել է Մարիամ Քվրիվիշվիլիին՝ նախարարի պաշտոնում նշանակվելու կապակցությամբ և նրա այցը Ադրբեջան գնահատել է որպես սերտ համագործակցության ցուցանիշ։ Շնորհակալություն հայտնելով հյուրընկալության և շնորհավորանքների համար՝ Մարիամ Քվրիվիշվիլին նշել է, որ իր համար պատիվ է հանդիպել պետության ղեկավարի հետ։

Վրաստանի էկոնոմիկայի նախարարը Ադրբեջանի նախագահին փոխանցել է Վրաստանի վարչապետ Իրակլի Կոբախիձեի ողջույնները։

Ինչպես հաղորդում են ադրբեջանական լրատվամիջոցները, Իլհամ Ալիևը գոհունակությամբ հիշել է Իրակլի Կոբախիձեի այս տարվա հունվարին, Վրաստանում խորհրդարանական ընտրություններից հետո Ադրբեջան կատարած առաջին արտասահմանյան այցը և նշել, որ դա Ադրբեջանի և Վրաստանի միջև բարեկամության և եղբայրության օրինակ է։ Մարիամ Քվրիվիշվիլին ընդգծել է, որ նախագահ Իլհամ Ալիևը համաշխարհային առաջնորդ է և նշել, որ պետության ղեկավարին Վրաստանում ընդունում են որպես ընկերոջ։

«Երկկողմ հարաբերություններն ունեն լայն օրակարգ, որը ներառում է տարբեր ոլորտներ: Հանդիպմանը նշվել է, որ Ադրբեջանի և Վրաստանի միջև էներգետիկայի և տրանսպորտի ոլորտներում հաստատված համագործակցությունը և համատեղ իրականացվող նախագծերը ռազմավարական նշանակություն ունեն ոչ միայն երկու երկրների, այլև ավելի լայն տարածաշրջանի համար», – ասվել է հանդիպման ժամանակ։

Խոսելով կապի, էներգետիկայի, առևտրի, ներդրումների և այլ ոլորտներում երկկողմ և բազմակողմ ձևաչափերով ավելի սերտ համագործակցության կարևորության մասին՝ կողմերը հույս են հայտնել, որ հարաբերությունները կընդլայնվեն տարբեր ուղղություններով: Հանդիպման ընթացքում ընդգծվել է, որ Ադրբեջանը Վրաստանի հիմնական առևտրային գործընկերն է, ընդգծվել է առևտրաշրջանառության ավելացման մեծ ներուժի առկայությունը, և կողմերը մտքեր են փոխանակել տնտեսության տարբեր ոլորտներում համատեղ նախագծերի իրականացման վերաբերյալ: