«Լելո – Ուժեղ Վրաստանի» առաջնորդ Մամուկա Խազարաձեն հայտարարում է, որ ընտրություններին մասնակցելու վերաբերյալ որոշումը «Լելո – Ուժեղ Վրաստանը» չի փոխի։

Խազարաձեն այս մասին ասել է լրագրողներին՝ Ռուսթավիի քրեակատարողական հիմնարկից ազատ արձակվելուց հետո։

«Ընտրությունների վերաբերյալ որոշում արդեն ընդունել է «Ուժեղ Վրաստանը»։ Նախագահի այսօրվա որոշումը հենց այն է ցույց տալիս, որ ցանկանում են պառակտում ու հակասություն մտցնել ընդդիմադիր դաշտում։ Թեև պայքարի տակտիկան տարբեր է, բոլորիս նպատակը նույնն է։ Այդ նպատակը մեր երկրի եվրոպական ապագան է, նոր խորհրդարանական ընտրությունների անցկացումը, քաղաքական բանտարկյալների՝ խղճի բանտարկյալների ազատումը։ Այս նպատակին «Լելո – Ուժեղ Վրաստանը» երբեք չի դավաճանել և կշարունակի այս պայքարը։ Մնացածի վերաբերյալ՝ ես բոլորին հարգում եմ, սակայն որոշումները մենք կընդունենք ինքնուրույն։ Ընտրություններին մասնակցելու որոշումը մենք արդեն ընդունել էինք այն ժամանակ, երբ դեռ բանտում էինք», – հայտարարել է Մամուկա Խազարաձեն։

«Լելո – Ուժեղ Վրաստանի» առաջնորդ Մամուկա Խազարաձեն քիչ առաջ լքեց Ռուսթավիի բանտը։ Այսօր Վրաստանի նախագահը՝ Միխեիլ Քավելաշվիլին, ներում է շնորհել Մամուկա Խազարաձեին և Բադրի Ջափարիձեին։