Իսրայելի պետությունում իր առաջին պաշտոնական այցի շրջանակում Վրաստանի արտաքին գործերի նախարար Մակա Բոչորիշվիլին հանդիպել է Իսրայելի արտաքին գործերի նախարար Գիդեոն Սահային։ Տեղեկատվությունը տարածել է Վրաստանի արտաքին գործերի նախարարությունը։

Նախարարության տվյալներով՝ հանդիպման ընթացքում նախարարները շեշտել են Վրաստանի և Իսրայելի պատմական ու մշակութային կապերը և քննարկել երկկողմ հարաբերությունների հարցեր։

Հատուկ ուշադրություն է դարձվել երկու երկրների միջև առևտրատնտեսական համագործակցության խորացման հնարավորություններին։

Քննարկվել է նաև տարածաշրջանում առկա անվտանգության միջավայրը։ Վրաստանի արտաքին գործերի նախարարն ողջունել է Իսրայելի և «Համաս»-ի միջև Գազայի խաղաղության ծրագրի առաջին փուլի վերաբերյալ ձեռք բերված համաձայնությունը։ Ընդգծվել է ԱՄՆ-ի և անձամբ նախագահ Դոնալդ Թրամփի առանձնահատուկ ջանքերն ու ներդրումը տարածաշրջանում խաղաղության հասնելու գործում։ Նախարարը ևս մեկ անգամ հաստատել է Վրաստանի աջակցությունը հակամարտության խաղաղ կարգավորմանը։

Հանդիպման ավարտին կողմերը վերահաստատել են երկկողմ ձևաչափով համագործակցությունը շարունակելու պատրաստակամությունը։