Վրաստանն իսկապես ունի օտար ազդեցությունների դեմ պայքարի մեծ փորձ և կարող է այն կիսել նաև այլ երկրների հետ, – հայտարարել է Վրաստանի արտաքին գործերի նախարար Մակա Բոչորիշվիլին։

Ինչպես նշել է Բոչորիշվիլին, Վրաստանում ընդունված օրենսդրական փոփոխությունները ուղղված են հենց այն ուղղությամբ, որով այսօր շարժվում է Եվրոպայի խորհրդի աշխատանքը, և Վրաստանը պատրաստ է կիսվել իր փորձով։

«Ընդհանուր առմամբ, օտար միջամտություններն ու օտար ազդեցությունները շատ երկրների համար խնդիր են, և սա նոր երևույթ չէ, սակայն այլ հարց է, թե որքանով է դա ընդունվում։ Մենք ականատես եղանք բավական սուր վերաբերմունքի Վրաստանի պայքարի նկատմամբ՝ հենց օտար ազդեցությունների դեմ։ Ցավոք, տեսնում ենք, որ որոշ դերակատարների կողմից այս վերաբերմունքը շարունակվում է նաև այսօր, այն դեպքում, երբ լիովին ակնհայտ է, որ այն օրենսդրական փոփոխությունները և նախաձեռնությունները, որոնք իրականացվում են Վրաստանի կողմից, ուղղված են հենց այն նպատակին, որի ուղղությամբ այսօր մտածում և աշխատում է Եվրոպայի խորհուրդը՝ օտար ազդեցությունները որևէ կերպ սահմանափակելու և դրանց հակազդելու համար օրենսդրական շրջանակ ձևավորելու ուղղությամբ։ Սա այն ոլորտն է, որտեղ Վրաստանն արդեն ունի մեծ փորձ, որը կարող է փոխանցել նաև այլ երկրներին։ Իհարկե, մենք կշարունակենք աշխատանքը, այդ թվում՝ Եվրոպայի խորհրդի շրջանակում, որպեսզի մեր փորձը ավելի ճիշտ ընկալվի, քան դա մինչ այժմ անում էին որոշ դերակատարներ», – նշել է Բոչորիշվիլին։

Տեղեկացնենք, որ Եվրոպայի խորհուրդը իր անդամ երկրներին, այդ թվում՝ Վրաստանին, խնդրել է կիսվել օտար տեղեկատվական մանիպուլյացիաների և միջամտությունների վերաբերյալ տեղեկատվությամբ։ Միևնույն ժամանակ, խորհրդարանի եվրոպական ինտեգրման հանձնաժողովի նախագահ Լևան Մախաշվիլին հաստատել է, որ Վրաստանը Եվրոպայի խորհրդին ուղարկել է փաստաթուղթ՝ օտար ազդեցություններին դիմակայելու և դրանց դեմ պայքարի ուղղությամբ սեփական փորձի վերաբերյալ։