Արաբական ներդրման նպատակն է Վրաստանում իրագործել մի նախագիծ, որը նոր դարաշրջան կբացի երկրի տնտեսական զարգացման և հասարակության տնտեսական հզորացման համար։ Այս մասին հայտարարել է Վրաստանի արտաքին գործերի նախարար Մակա Բոչորիշվիլին։

Նախարարի խոսքով՝ նախագիծն իրականացվում է երկրի բարօրության համար։

«Այս նախագիծը որևէ առնչություն չունի այն դեզինֆորմացիայի հետ, որը տարածվում է։ Այդ դեզինֆորմացիայի միակ նպատակը երկրի մեջ օտարերկրյա ներդրումների հոսքի, Վրաստանի տնտեսական հզորացման և զարգացման խոչընդոտումն է։ Մենք բազմաթիվ անգամներ տեսել ենք նմանատիպ դեզինֆորմացիոն արշավներ, որոնց արդյունքում վնասվել են երկրի շահերը։ Սա ևս մեկ փորձ է վնասելու երկրի ազգային շահերը, տնտեսական հզորացման հնարավորություններն ու նպատակները», – հայտարարել է Բոչորիշվիլին։