Լրատվամիջոցների տեղեկություններով՝ ՆԱՏՕ-ի գլխավոր քարտուղարի պաշտոնում Ենս Ստոլտենբերգին կարող է փոխարինել Ուրսուլա ֆոն դեր Լայենը
Եվրահանձնաժողովի նախագահ Ուրսուլա ֆոն դեր Լայենը կարող է փոխարինել Ենս Ստոլտենբերգին՝ ՆԱՏՕ-ի գլխավոր քարտուղարի պաշտոնում։ Այս մասին գրում է «The Sun»-ը՝ հիմնվելով աղբյուրի վրա։
Եվրահանձնաժողովի նախագահի պաշտոնում Ուրսուլա ֆոն դեր Լայենի լիազորությունների ժամկետը լրանում է հաջորդ տարի, սակայն, ըստ ԶԼՄ-ների, Հյուսիսատլանտյան դաշինքի մի քանի երկրներ սատարում են ֆոն դեր Լայենի ընտրությանը ՆԱՏՕ-ի գլխավոր քարտուղարի պաշտոնում այս տարվա հոկտեմբերին։
Բրիտանական լրատվամիջոցները հայտնում են, որ հավանական է, որ Լոնդոնը վետո կդնի ֆոն դեր Լեյենի թեկնածության վրա։
Նշենք, որ Ուրսուլա ֆոն դեր Լայենը 2013-2019 թվականներին Անգելա Մերկելի կառավարությունում զբաղեցրել է պաշտպանության նախարարի պաշտոնը։
Դաշինքի ներկայիս գլխավոր քարտուղար Ենս Ստոլտենբերգի պաշտոնավարման ժամկետը լրանում է տարեվերջին։
Միաժամանակ ԶԼՄ-ներում հաղորդվում էր նաև, որ Ամերիկայի Միացյալ Նահանգները պաշտպանում է Ուրսուլա ֆոն դեր Լայենի թեկնածությունը ՆԱՏՕ-ի ղեկավարի պաշտոնում։