Ռազմական գործողության շրջանակներում ԱՄՆ զինվորականները ռմբակոծել են ռազմաբազաները և երկրի գլխավոր նավահանգիստը։ Վենեսուելայի ընդդիմության առաջնորդ Մարիա Կորինա Մաչադոն այս մասին ասել է «Սի Բի Էս»-ին տված հարցազրույցում։

Ըստ տարածված տեղեկությունների՝ ռմբակոծվել են Կարակասի գլխավոր ռազմաբազան՝ Ֆուերտե Տիունան, Կարակասի գլխավոր ավիաբազան՝ Լա Կարլոտան, Էլ Վոլկան ազդանշանային անտենան և Կարիբյան ծովի ափին գտնվող Լա Գուայրա նավահանգիստը։

Կոլումբիայի նախագահ Գուստավո Պետրոյի խոսքով՝ ԱՄՆ զինվորականները ռմբակոծել են Վենեսուելայի խորհրդարանի շենքը։

Տեղեկատվության համար՝ Սպիտակ տունը հարձակման վերաբերյալ պաշտոնական հայտարարություն չի արել։ Սակայն, ավելի վաղ ամերիկյան լրատվամիջոցներում տեղեկատվություն էր հայտնվել, որ ԱՄՆ նախագահ Դոնալդ Թրամփը հրաման է տվել հարվածներ հասցնել Վենեսուելայի տարածքում։ «Սի Բի Էս»-ի հաղորդմամբ, Թրամփը հրաման է տվել ռմբակոծել Վենեսուելան գործողության մեկնարկից մի քանի օր առաջ։ Ըստ տեղեկությունների՝ գործողությունը նախատեսված էր սկսել ավելի վաղ, բայց հետաձգվել է վատ եղանակային պայմանների պատճառով։ Տեղեկատվության համար՝ Կարակասում լսվում են պայթյունների ձայներ և քաղաքի վրայով ցածր թռչող ինքնաթիռ է նկատվել։

Վենեսուելայի նախագահ Նիկոլաս Մադուրոն երկրում արտակարգ դրություն է հայտարարել։ Վենեսուելայի կառավարությունը հայտարարություն է տարածել այս մասին՝ նշելով, որ ամբողջ երկիրը պետք է «մոբիլիզացվի՝ իմպերիալիստական ​​ագրեսիան հաղթահարելու համար»։ Բացի այդ, Վենեսուելան մեղադրեց ԱՄՆ-ին հարձակման մեջ և դատապարտեց «ռազմական ագրեսիան»՝ որպես այս ագրեսիայի նպատակ նշելով Վաշինգտոնի ցանկությունը՝ յուրացնել երկրի նավթն ու հանքանյութերը։