Վրաստանի Առաջին ալիքի լրագրող Շալվա Սումբաձեն հետաքննչական ծառայությունում հարցաքննվում է լրագրողական գործունեությանը խոչընդոտելու փաստի հետաքննության շրջանակներում։
Հետաքննությունը սկսվել է հանրային տարածքում տարածված տեսագրությունների հիման վրա։

«Նոյեմբերի 19-ի առավոտյան միջադեպ է տեղի ունեցել, ինչի պատճառով էլ կապվել են ինձ հետ։ Նրանք ինձ ասացին, որ իրենք որոշ հարցեր ունեն՝ հիմնված այն նյութի վրա, որը տարածվել է ինչպես սոցիալական ցանցերում, այնպես էլ մեր կայքում: Ամենայն հավանականությամբ խոսքը վերաբերում է խոչընդոտման փաստին, որը տեղի է ունեցել հանրահավաքի ժամանակ։ Կոնկրետ իմ գործով կապվել են ինձ հետ, բայց մինչ այդ էլ մեր լրագրողներին և այլ լրատվամիջոցներին միջամտելու փաստ է եղել»,- նախքան քննչական ծառայություն մտնելը ասել է Շալվա Սումբաձեն։

Հատուկ քննչական ծառայությունը նոյեմբերի 20-ին տեղեկություն է տարածել, ըստ որի՝ նոյեմբերի 18-19-ը հանրահավաքի ժամանակ հետաքննություն է սկսվել տարբեր հեռուստաընկերությունների աշխատակիցների լրագրողական գործունեությունը ապօրինի խոչընդոտելու փաստի առթիվ։