ԱՄՆ-ի պետդեպարտամենտի պատվիրակության հետ հանդիպման ժամանակ մենք քննարկեցինք այն ներդրումները, որոնք իրականացրել է Վրաստանի կառավարությունը կապակցվածության տեսանկյունից, – այս մասին Հանրային հեռուստատեսության «Բիզնեսգործընկեր» հաղորդման ժամանակ ասել է Վրաստանի կառավարության վարչակազմի ղեկավար Լևան Ժորժոլիան։

Լևան Ժորժոլիան խոսել է այն հարցերի մասին, որոնց վրա շեշտադրումը եղել է պատվիրակության հետ հանդիպման ընթացքում։

«Մենք խոսեցինք այսպես կոչված Թրամփի միջանցքի մասին, որը, բնականաբար, գտնվում է մեր տարածաշրջանում։ Այս միջանցքը չի անցնում Վրաստանի տարածքով, սակայն մենք ընդգծեցինք, որ եթե տարածաշրջանում լինի միջանցք, որտեղ ամերիկացիները կապահովեն բեռների անվտանգ փոխադրում, դա կանդրադառնա ամբողջ տարածաշրջանի վրա։ Բայց միաժամանակ նշեցինք, որ Թուրքիայի, Հայաստանի և Ադրբեջանի առջև դեռևս մեծ ճանապարհ կա ենթակառուցվածքների զարգացման տեսանկյունից։ Սրանք մեր բարեկամ երկրներն են, և եթե նրանց տնտեսությունները զարգանան, դա տնտեսության մեջ ակսիոմ է, որ դա անմիջապես կանդրադառնա նաև հարևանների վրա, որովհետև մենք շատ լավ հարաբերություններ ունենք մեր երեք հարավային հարևանի հետ։ Մենք քննարկեցինք նաև այն ներդրումները, որոնք կառավարությունը՝ Վրաստանը, կատարել է կապակցվածության ոլորտում։ Վրաստանը միջանցք է ութ ծովեզրյա ելք չունեցող երկրների համար, այդ թվում՝ Հայաստանի և Ադրբեջանի, և այս առումով Վրաստանի դերը, հաշվի առնելով նրա աշխարհագրական դիրքը, շատ կարևոր է։

Մենք մեծ գումարներ ենք ներդնում ճանապարհային, նավահանգստային և երկաթուղային ենթակառուցվածքների զարգացման մեջ։ Կարելի է ասել, որ Ադրբեջանի և Ղազախստանի հետ մենք արդեն ունենք շատ սերտ համագործակցություն բեռնափոխադրումների ոլորտում», – ասել է Լևան Ժորժոլիան։

Կառավարության վարչակազմի ղեկավարն ավելացրել է, որ պետդեպարտամենտի ներկայացուցիչը բարձր է գնահատել վրացական մաքսայինի աշխատանքը և խնդրել է վրացական կողմին՝ կիսվել փորձով հայ գործընկերների հետ։

«Նա եղել է Սադախլոյի մաքսակետում, տեսել է, թե ինչ տեխնոլոգիաներ են կիրառվում, ինչ պատրաստված կադրեր կան, և խնդրել է, որ մեր փորձը փոխանցենք հայ գործընկերներին։ Վերջին շրջանում Հայաստանի կառավարության շատ ներկայացուցիչներ այցելել են Վրաստան։ Այսօր հյուրընկալում էինք նախագահին, և ընդհանրապես, Վրաստանի և Հայաստանի, Վրաստանի և Ադրբեջանի հարաբերությունները օրինակելի են՝ ինչպես հարևանները պետք է լինեն։ Մենք կառավարական մակարդակով շատ լավ հաղորդակցություն ունենք», – նշել է Լևան Ժորժոլիան։