Վրաստանի խորհրդարանի եվրոպական ինտեգրման կոմիտեի նախագահ Լևան Մախաշվիլին, ԵԱՀԿ խորհրդարանական վեհաժողովի նախագահ Պերե Ժոան Պոնս Սամպիետրոյի և նրան ուղեկցող պատվիրակության հետ միասին, այցելել է օկուպացիոն գծի մոտ գտնվող Խուրվալեթի գյուղ: Այս մասին հաղորդում է Վրաստանի խորհրդարանի մամուլի ծառայությունը:

Նրանց խոսքով՝ Լևան Մախաշվիլին ԵԱՀԿ խորհրդարանական վեհաժողովի պատվիրակության անդամներին ներկայացրել է Ռուսաստանի կողմից Վրաստանի շրջանների շարունակական օկուպացիան և դրա բացասական հետևանքները, այնտեղ ապրող բնակչության խնդիրները, ինչպես նաև Վրաստանի համար օկուպացիայի հետ կապված անվտանգության մարտահրավերներն ու սպառնալիքները:

ԵԱՀԿ խորհրդարանական վեհաժողովի պատվիրակությունը գլխավորում է նախագահ Պերե Ժոան Պոնս Սամպիետրոն: Պատվիրակության կազմում են նաև՝ ԵԱՀԿ խորհրդարանական վեհաժողովի փոխնախագահ և Հարավային Կովկասի հարցերով հատուկ ներկայացուցիչ Լուիս Գրասան, քաղաքական հարցերի և անվտանգության կոմիտեի փոխնախագահ Եվրոսիմա Պեյովիչը, ժողովրդավարության, մարդու իրավունքների և մարդասիրական հարցերի կոմիտեի փոխնախագահ Քրիստին Բլոուերը և ԵԱՀԿ խորհրդարանական վեհաժողովի գլխավոր քարտուղար Ռոբերտո Մոնտելան: