«Ամերիկյան կողմը, ինչպես որ մինչ այժմ իրականացվել են մի քանի այցեր, ապրիլին ևս պլանավորում է ուղարկել առանձին խումբ, որը հնարավորություն կունենա ավելի խորությամբ ուսումնասիրել Վրաստանում ընթացող գործընթացները, ինչից հետո կձեռնարկվեն հաջորդ քայլերը և կուրվագծվեն ընդհանուր շահերը», – այս մասին հայտարարել է խորհրդարանի եվրոպական ինտեգրման հանձնաժողովի նախագահ Լևան Մախաշվիլին։

Նրա խոսքով՝ յուրաքանչյուր այցի և հանդիպման արդյունքում կողմերը փուլ առ փուլ, կոնկրետ օրակարգով փորձում են հարաբերությունները վերականգնել սկզբից՝ զրոյից։

«Հայտարարությունները և արձագանքները կապված են այն հանդիպումների ու այցերի հետ, որոնք իմ գործընկերներն ունեցել են ԱՄՆ-ում, այդ թվում՝ ինչպես կառավարության, այնպես էլ խորհրդարանի ներկայացուցիչները։ Կարևոր է նաև հեռախոսազրույցը, որը տեղի է ունեցել վարչապետի և պետքարտուղարի միջև։ Ամերիկյան կողմի դիրքորոշումն այն է, որ, ինչպես նախկինում իրականացվել են մի քանի այցեր, ապրիլին ևս պլանավորում են ուղարկել առանձին խումբ, որը հնարավորություն կունենա ավելի խորությամբ ուսումնասիրել Վրաստանում ընթացող գործընթացները, ինչից հետո կձեռնարկվեն հաջորդ քայլերը և կուրվագծվեն ընդհանուր շահերը։ Հասարակությունը տեսնում է, որ յուրաքանչյուր այցի և հանդիպման արդյունքում, փուլ առ փուլ, կոնկրետ օրակարգով փորձում ենք հարաբերությունները վերականգնել սկզբից՝ զրոյից։ Հենց այս գործընթացին է հետևում հասարակությունը։ Դրա հետ մեկտեղ, հասարակության մեջ հնչում են որոշակի մտահոգություններ, թե արդյոք այս գործընթացի հետևում չկա՞ որևէ գաղտնի օրակարգ։ Սակայն ցանկանում եմ վստահեցնել հասարակությանը, և նրանք դա նախկինում էլ են տեսել, որ մեր յուրաքանչյուր քայլը միշտ թելադրված է եղել՝ ելնելով Վրաստանի շահերից», – հայտարարել է Լևան Մախաշվիլին։

Նրա խոսքով՝ Ամերիկայի հետ հարաբերությունների վերագործարկման կամ ցանկացած այլ գործընկերոջ հետ համագործակցության գլխավոր ելակետը միշտ լինելու են Վրաստանի ազգային շահերը։

«Այնտեղ, որտեղ մեր շահերը կհամընկնեն Ամերիկայի շահերի հետ, իհարկե, այդ ընդհանուր հիմքի վրա առաջ կշարժվենք։ Սակայն, ինչպես բազմիցս նշել ենք, չենք պատրաստվում վերագործարկել հարաբերությունները ցանկացած գնով։ Գլխավոր առաջնահերթություններն են՝ խաղաղությունը Վրաստանում, կայունությունը և տնտեսական զարգացումը։ Հենց այս շահերի շուրջ, որտեղ կտեսնենք ընդհանուր հետաքրքրություն ԱՄՆ-ի հետ, կձեռնարկենք համապատասխան քայլեր», – հայտարարել է Լևան Մախաշվիլին։