Այսօր «Ուժեղ Վրաստան – Լելո» կոալիցիայի նախագահ Մամուկա Խազարաձեն, Թբիլիսիի քաղաքապետի միասնական թեկնածու Իրակլի Կուպրաձեն և նախընտրական շտաբի ղեկավար Թազո Դատունաշվիլին հանդիպում են ունեցել Բրյուսելի քաղաքապետի հետ։ Այս մասին տեղեկացնում է «Լելո» կուսակցության մամուլի ծառայությունը։

«Բարձր մակարդակի երկկողմ հանդիպման ժամանակ քննարկվել են Թբիլիսի–Բրյուսել ապագա գործընկերության մանրամասները՝ ինչպես մշակութային, այնպես էլ տնտեսական համագործակցության շրջանակում, ինչը ենթադրում է համատեղ ենթակառուցվածքային և կրթական նախագծերի պլանավորում և իրականացում», – նշված է կուսակցության տարածած հաղորդագրությունում։

«Լելո»-ի մամուլի ծառայության տվյալներով՝ Բրյուսելի քաղաքապետին հյուրերը ներկայացրել են Վրաստանում նախընտրական փուլում տիրող ծանր քաղաքական իրավիճակը։

Ֆիլիպ Կլոզը լիակատար աջակցություն է հայտնել Թբիլիսիի քաղաքապետի միասնական թեկնածուին տեղական ինքնակառավարման ընտրություններում։

«Այսօր մենք հանդիպեցինք Թբիլիսիի քաղաքապետի թեկնածու Իրակլի Կուպրաձեին։ Ցանկանում եմ նրան հայտնել լիակատար աջակցություն, քանի որ մեզ միավորում են այն համաեվրոպական արժեքները, որոնք շատ կարևոր են ինձ համար՝ որպես Եվրոպայի մայրաքաղաքի քաղաքապետ», – հայտարարել է Բրյուսելի քաղաքապետը։