Սալոմե Զուրաբիշվիլին միավորող գործիչ է և՛ ժողովրդի, և՛ երկրի ներսում ընդդիմադիր ուժերի համար, և նա նաև լավագույնս ներկայացնում է Վրաստանի շահերը միջազգային ասպարեզում, ասել է «Ուժեղ Վրաստանի» անդամ Լանա Գալդավան։

Գալդավան մեկնաբանել է Գիորգի Վաշաձեի հայտարարությունը, որտեղ Վաշաձեն նշել է. «Ելքը ընդհանուր մեծ քաղաքական հարթակի ստեղծումն է։ Ես ուզում եմ բոլոր կողմերին, այդ թվում՝ տիկին Սալոմեին ասել, որ հիմա ժամանակը չէ տարբերակելու, թե ով որ կուսակցությանն է պատկանում»։

«Մենք ստորագրել ենք նրա նախաձեռնած «Վրացական խարտիան», որը պարտավորություն է ընդդիմադիր այլ գործընկերների հետ միասին բարեփոխումներ իրականացնել։ Միաժամանակ մենք այլ ընդդիմադիր և հասարակական կազմակերպությունների հետ մասնակցում ենք Սալոմե Զուրաբիշվիլիի նախաձեռնած խմբին, որն աշխատում է ընտրությունների ուղղությամբ։ Ուստի մենք շատ հաճախակի շփումներ ունենք, այս փուլում ավելիի մասին խոսելը վաղաժամ է, դա կպարզվի համագործակցության ընթացքում։ Ես կոնկրետ չհասկացա, թե ինչ նկատի ուներ պարոն Գիորգին։ Ընդդիմությունը համակարգման առումով իսկապես խնդիր չունի արտաքին և ներքին ասպարեզում ներկայացնելու մեր երկրի լավագույն շահերը»,- ասել է Գալդավան։