Ֆինանսների նախարարության քննչական ծառայությունը հաղորդում է, որ «Քրիստալ Գրուպ»-ի ղեկավար անձը ձերբակալվել է մեծ քանակությամբ ապօրինի եկամուտների լեգալացման փաստով։ Այս մասին հայտարարվել է քննչական ծառայությունում կայացած ճեպազրույցի ժամանակ։

Ճեպազրույցում նշվել է, որ նախաքննությունը շարունակվում է՝ «Քրիստալ Գրուպ»-ի հանցավոր գործունեության ուսումնասիրության և հնարավոր կապ ունեցող անձանց, այդ թվում՝ հանցավորությանն օժանդակած պետական պաշտոնյաների հայտնաբերման ու բացահայտման նպատակով։

«2025 թվականի նոյեմբերի 7-ին մեր աշխատակիցները ձերբակալել են «Քրիստալ Գրուպ»-ի ղեկավարին մեծ քանակությամբ ապօրինի եկամուտների լեգալացման փաստով։ Նախաքննությամբ պարզվել է, որ «Քրիստալ Գրուպ» առևտրային անվան տակ միավորված՝ ՍՊԸ «Բակուրիանի Բիզնես Գրուպ»–ի և ՍՊԸ «Հոթելս Մենեջմենթ Գրուպ»–ի հիմնադիրը, Բորժոմիի մունիցիպալիտետի Բակուրիանի բնակավայրում՝ Դիդվելի տարածքում, առանց համապատասխան թույլտվության ինքնակամ կառուցել է հինգ հյուրանոց-ապարտամենտ, տեղադրել է մասնավոր ճոպանուղի, դահուկային ուղի և տոբոգան (սահուղի), որոնք հասանելի են եղել միայն «Քրիստալ Գրուպ»-ի հաճախորդներին։ Չարտոնված այդ շինությունների վաճառքից ստացված ապօրինի եկամուտները կազմել են մի քանի տասնյակ միլիոն լարի։

Ներկայումս քննչական գործողություններով հաստատվել է 1 894 925 լարիի չափով ապօրինի եկամուտների լեգալացման փաստ։

Նախաքննությունը ընթանում է Վրաստանի քրեական օրենսգրքի 192-րդ հոդվածի առաջին մասով, 218-րդ հոդվածի երկրորդ մասով և 194-րդ հոդվածի երրորդ մասով, ինչը որպես պատիժ նախատեսում է ազատազրկում 9-ից 12 տարի ժամկետով։

Ֆինանսների նախարարության քննչական ծառայության աշխատակիցները պետական անվտանգության ծառայության հետ համակարգմամբ իրականացնում են օպերատիվ-հետախուզական միջոցառումներ՝ հատուկ ուշադրություն դարձնելով առողջարանային գոտիներում հողերի յուրացման և ապօրինի շինարարությունների դեպքերին, որոնք լրջորեն վնասում են պետության և հանրության շահերին», – նշել են քննչական ծառայությունում։