Վրաստանի վարչապետ Իրակլի Ղարիբաշվիլին հանդիպել է Վրաստանում Ամերիկայի Միացյալ Նահանգների դեսպան Քելլի Դեգնանի հետ:

Կառավարության աշխատակազմում տեղի ունեցած հանդիպմանը քննարկվել են Վրաստան-ԱՄՆ երկկողմ համագործակցության օրակարգի հարցերի լայն շրջանակ:

Կառավարության ղեկավարը նշել է, որ Միացյալ Նահանգները Վրաստանի կարևոր ռազմավարական գործընկերն է, և կառավարությունը բարձր է գնահատում պաշտոնական Վաշինգտոնի ամուր աջակցությունը մի շարք ոլորտներում, այդ թվում` երկրում բարեփոխումների իրականացմանը, ինչպես նաև Covid 19-ի համավարակով առաջացած սոցիալ-տնտեսական դժվարությունների հաղթահարմանը:

Իրակլի Ղարիբաշվիլին ևս մեկ անգամ ընդգծել է ԱՄՆ-ի, որպես ուժեղ ռազմավարական գործընկերոջ հետագա աջակցության կարևորությունը, որպեսզի երկիրը մոտ ապագայում կարողանա ստանալ անհրաժեշտ քանակությամբ պատվաստանյութեր և սկսել պատվաստել բնակչությանը:

Վարչապետը և դեսպանը խոսեցին նաև երկրում ընթացող քաղաքական գործընթացների մասին: Նշվեց, որ աշխարհում և տարածաշրջանում առկա մարտահրավերների ֆոնի ներքո կողմերը պետք է ջանքեր գործադրեն Վրաստանում ընթացող քաղաքական գործընթացները կառուցողական, երկխոսության ռեժիմում անցկացնելու համար:

Հանդիպման ընթացքում քննարկվել են նաև տարածաշրջանում անվտանգության տեսանկյունից ստեղծված իրավիճակը և Վրաստանի բռնազավթված տարածքներում ստեղծված ծանր վիճակը:

Ամերիկացի դիվանագետը Վրաստանի վարչապետին վերահաստատել է Միացյալ Նահանգների ամուր աջակցությունը երկրի տարածքային ամբողջականության ու ինքնիշխանության նկատմամբ:

«Մենք շատ արդյունավետ հանդիպում ունեցանք Վրաստանի վարչապետի հետ: Միացյալ Նահանգներն ու Վրաստանը ունեն համապարփակ օրակարգ, և մեզ համար կարևոր է շարունակել աշխատել այդ նախաձեռնությունների վրա ՝ նոր վարչապետի ղեկավարությամբ: Մենք ցանկանում ենք, որ քաղաքական ճգնաժամն արագորեն հանդարտվի, որպեսզի Վրաստանը վերադառնա իր առջև ծառացած այլ կարևոր մարտահրավերների, այդ թվում ՝ տնտեսական իրավիճակի վերականգնմանը: Միացյալ Նահանգները կշարունակեն աջակցել Վրաստանին, որպեսզի երկիրը կարողանա գործի դնել տնտեսությունը, արձագանքել կորոնավիրուսի նոր համավարակին և, իհարկե, պահպանել անվտանգության ուժեղ նշանակետը: Մենք վերահաստատում ենք մեր հստակ աջակցությունը Վրաստանի ինքնիշխանության և տարածքային ամբողջականության նկատմամբ», – հայտարարել է Քելլի Դեգնանը վարչապետի հետ հանդիպումից հետո:

Տեղեկատվությունը տարածում է Վրաստանի վարչապետի մամուլի ծառայությունը: