Քանի դեռ վրացիները չեն տեսնի արժանահավատ գործողություններ, կոնկրետ գործողություններ օկուպացված տարածքների ուղղությամբ, Կրեմլի հայտարարությունները մեծ նշանակություն չեն ունենա, – այս մասին հայտարարել է Վրաստանում ԱՄՆ-ի դեսպան Քելի Դեգնանը:

Նշված մեկնաբանությամբ նա արձագանքել է Ռուսաստանի արտաքին գործերի նախարար Սերգեյ Լավրովի երեկվա հայտարարությանը, որ «եթե Վրաստանը ցանկանում է նորմալ կյանք Ռուսաստանի հետ որպես հարևան, Մոսկվան պատրաստ է վերականգնել հարաբերությունները»:

«Վրաստանի բնակչությունը մշտապես լսում է հայտարարություններ Կրեմլից: Նրանք կունենան վստահելիություն, եթե դուրս կգան Վրաստանի օկուպացված տարածքներից և փոխեն Ցխինվալիի և Աբխազիայի ճանաչումը, եթե կատարեն իրենց 2008 թվականին ստանձնած պարտավորությունները: Այս ուղղությամբ ձեռնարկված քայլեր չեմ տեսնում: Շուկաների վրա դեռ սահմանափակումներ կան: Ինձ թվում է, մինչև վրացիները չտեսնեն արժանահավատ գործողություններ, օկուպացված տարածքների ուղղությամբ կոնկրետ գործողություններ, Կրեմլի հայտարարությունները մեծ նշանակություն չեն ունենա», – հայտարարել է Քելի Դեգնանը: