Թուրքիայի դեսպանատան մոտ քաղաքացիները ցույց են անցկացրել՝ ի նշան Ուկրաինայի հետ համերաշխության։ Ցուցարարներն ասում են, որ Թուրքիան կարող է օգնել Ուկրաինային տարհանել Մարիուպոլի շրջանում արգելափակված խաղաղ բնակիչներին և վիրավոր մարտիկներին:

Նրանց խոսքով՝ խաղաղ բնակիչներն ու մարտիկներն արդեն մի քանի ամիս է, ինչ տարածքում են գտնվում և չեն կարողանում լքել տարածքը։

«Ավելի քան երկու ամիս է, ինչ Մարիուպոլը գտնվում է շրջափակման մեջ և Մարիուպոլի Ազովստալի տարածքում Ազովի գունդը հերոսաբար կռվում է՝ կանգնեցնելով թշնամուն, բայց դա արդեն շատ է դժվարացել։ Արդեն դժվար է հակահարված տալ, նրանք ունեն բազմաթիվ վիրավորներ, խաղաղ բնակիչներ, իսկ Ռուսաստանը թույլ չի տալիս լքել տարածքը և դուրս բերել վիրավորներին։ Միակ ուժը, որը կարող է դա անել, Թուրքիան է, որն իսկապես կարող է տարհանել նրանց ու խաղաղություն հաստատել։ Մենք խնդրանք ունենք օգնելու, չթողնել այս տղաներին ու այնտեղ մնացած մարդկանց, բնակչությանը»,- ասել է ցուցարարներից Իրակլի Ախվլեդիանին։