Կցանկանայի, որ եթե Վրաստանը դա թույլ տար, ԱՄՆ-ը Վրաստանում բացեր ռազմակայան, որը Վաշինգտոնը կօգտագործեր Սիրիա կամ Իրաք զորքեր ուղարկելու համար,- այս մասին Վրաստանի առաջին ալիքին տված հարցազրույցում հայտարարել է Եվրոպայում ԱՄՆ-ի ռազմական ուժերի նախկին հրամանատար Բեն Հոջեսը:

Ըստ Բեն Հոջեսի, ԱՄՆ-ի և ՆԱՏՕ-ի հիմնական նպատակը պետք է լինի Սևծովյան տարածաշրջանում նախաձեռնություն ստանձնելը:

«Ես կցանկանայի, որ Վրաստանը հրավիրեր ԱՄՆ-ին, Մեծ Բրիտանիային և մի քանի այլ երկրների` Վրաստանում ենթակառուցվածքներ տեղակայելու համար: Ես չեմ խոսում խոշոր ենթակառուցվածքների մասին, սակայն դա կարող է լինել օդային գործողություններին օժանդակող ենթակառուցվածք: Օրինակ ՝ ինքնաթիռների լիցքավորում, ինչպես նաև ցամաքային ուժերի համար անհրաժեշտ այլ ռեսուրսների կուտակումներ: Ես նկատի ունեմ այն ​​իրերը, որոնք կարող են օգտագործվել ճգնաժամի ընթացքում կամ մարզվելիս: Կարծում եմ նաև, որ եթե Վրաստանը կառուցի Անակլիայի նավահանգիստը, լավ կլինի, քանի որ այս դեպքում ԱՄՆ-ի ռազմածովային ուժերի նավերը ավելի հաճախ կկարողանան այցելել Վրաստան: Սա այն է, ինչ ես նկատի ունեմ ենթակառուցվածք ասելով: Ես չեմ խոսում ռազմական ուժերի մշտական ​​տեղակայման մասին, նկատի ունեմ ռոտացիոն ուժերը: Սա կխրախուսի ԱՄՆ-ին, Մեծ Բրիտանիային և այլ երկրներին ավելի հաճախ այցելել Վրաստան: Ես կցանկանայի նաև, որ եթե Վրաստանը տար դրա թույլտվությունը, ԱՄՆ-ը բացեր ռազմակայան, որը Վաշինգտոնը կօգտագործեր զորքերը Սիրիա կամ Իրաք ուղարկելու համար: Վրաստանում նման բազայի բացումը կարող է օգտակար լինել: Հիմնական նպատակն է, որ ԱՄՆ-ը և ՆԱՏՕ-ն նախաձեռնություն ստանձնեն Սև ծովում և մշտապես չգործեն Կռեմլի գործողությունների դեմ, այլ ընդհակառակը, մենք պետք է ստիպենք Կրեմլին արձագանքի մեր քայլերին: Սա սադրիչ գործողություն չէ: Ռուսաստանը սադրանքի կարիք չունի: Ռուսաստանը Վրաստան և Ուկրաինա ներխուժեց այն ժամանակ, երբ Ռուսաստանի նկատմամբ մեր մոտեցումը մեղմ էր: Դա տեղի ունեցավ այն բանից հետո, երբ մենք բոլոր տանկերը դուրս բերեցինք Գերմանիայից: Ուստի մենք չպետք է անհանգստանանք Ռուսաստանին սադրելու համար»,- հայտարարել է Բեն Հոջեսը:

Ըստ նրա, կարևոր է, որ ԱՄՆ-ի նոր նախագահի վարչակազմը շարունակի ճնշում գործադրել Ռուսաստանի վրա և դա անել Գերմանիայի և Ֆրանսիայի հետ միասին:

«Գերմանիան Միացյալ Նահանգների կարևոր դաշնակիցն է և միևնույն ժամանակ, միակ երկիրը, որը կարող է ազդել Կրեմլի վարքի վրա: ԱՄՆ-ը պետք է սերտորեն համագործակցեն Գերմանիայի կառավարության հետ `Կրեմլի վրա ճնշումը պահպանելու համար: Մենք պետք է նաև խրախուսենք Ֆրանսիային, որպեսզի Փարիզը նույնպես շարունակի ճնշում գործադրել Կրեմլի վրա: Սակայն ամեն ինչ կախված է ԱՄՆ-ից: Վերջին չորս տարիների ընթացքում ԱՄՆ-ի նախագահի դիրքորոշումը պարզ չէ: Չնայած Թրամփն ընդլայնել է իր ներկայությունը Գերմանիայում և ընդհանրապես Եվրոպայում, նա իրականում երբեք չի դատապարտել Կրեմլի արարքները: Հուսով եմ, որ Բայդենի վարչակազմը կաշխատի Ֆրանսիայի և Գերմանիայի հետ, որ ճնշում գործադրվի Մոսկվայի վրա, որպեսզի Կրեմլը հարգի միջազգային իրավունքը և ինքնիշխան սահմանները: Մենք պետք է դիվանագիտական ​​և տնտեսական ճնշում գործադրենք Ռուսաստանի վրա: Մենք պետք է պատասխանենք Ռուսաստանին, երբ նա խախտում է միջազգային նորմերը: Եթե ԱՄՆ-ը, Գերմանիան և Ֆրանսիան միասին աշխատեն այս հարցում, հնարավոր կլինի արդյունքի հասնել», – հայտարարել է Բեն Հոջեսը, Վրաստանի առաջին ալիքին տված հարցազրույցում: