Կայա Կալլասը հանդիպել է Պաղեստինի ինքնավարության վարչապետի հետ
Եվրամիության արտաքին գործերի և անվտանգության քաղաքականության գերագույն ներկայացուցիչ Կայա Կալլասը հանդիպում է ունեցել Պաղեստինի ինքնավարության վարչապետ Մուհամմադ Մուստաֆայի հետ։
Հանդիպումը տեղի է ունեցել Իսրայելի և ՀԱՄԱՍ-ի միջև հրադադարի և պատանդների ազատման համաձայնագրի հայտարարությունից հետո։
«Այս համաձայնագիրը կարող է քայլ լինել դեպի կայուն խաղաղություն, բայց մենք բոլորս գիտենք, որ շատ դժվար մարտահրավերներ են սպասվում», – գրել է Կալլասը սոցցանցերում։
Կայա Կալլասի խոսքով՝ Եվրամիությունը պատրաստ է մարդասիրական և վերականգնողական օգնություն ցուցաբերել տարածաշրջանին։ Այդ նպատակով Եվրամիությունն արդեն 120 միլիոն եվրոյի օգնության նոր փաթեթ է հատկացրել Գազայի հատվածին։
Բացի այդ, ԵՄ արտաքին հարաբերությունների և անվտանգության քաղաքականության գերագույն ներկայացուցիչը նշել է, որ բանակցություններ են ընթանում ԵՄ դիտորդական առաքելությունը Ռաֆահում վերատեղակայելու ուղղությամբ, որի նպատակն է սահմանին կայունություն ապահովել։