Կայա Կալաս. Մենք լրջորեն քննարկում ենք սառեցված ակտիվների հարցը, անհնար է պատկերացնել, որ մենք այս գումարը Կրեմլին կվերադարձնենք հրադադարից կամ խաղաղության համաձայնագրից հետո, եթե փոխհատուցումները չեն վճարվել
Եվրամիության բարձր ներկայացուցիչ Կայա Կալլասը հայտարարում է, որ Ռուսաստանին սառեցված ակտիվները չպետք է վերադարձվեն առանց ռեպարացիաների վճարման՝ նույնիսկ հրադադարի կամ խաղաղության համաձայնագրի դեպքում։
Կայա Կալլասը այս մասին խոսել է Կոպենհագենում՝ ԵՄ արտգործնախարարների ոչ պաշտոնական հանդիպման նախաշեմին։ Նրա խոսքով՝ այսօրվա քննարկումները վերաբերում են երկու հիմնական թեմային՝ Ուկրաինայում ընթացող պատերազմին և Մերձավոր Արևելքում ստեղծված իրավիճակին։
«Արտգործնախարարների հանդիպում է նախատեսված։ Թեմաներ շատ կան, սակայն սա ոչ պաշտոնական հանդիպում է, և որոշումներ ընդունել չենք կարող։ Նախ և առաջ կխոսենք Ռուսաստանի՝ Ուկրաինայի դեմ պատերազմի մասին։ Հստակ է, որ Ռուսաստանը խաղաղություն չի ուզում։ Զելենսկու և Ռուսաստանի միջև բանակցությունների համար բազմաթիվ դիվանագիտական ջանքեր են գործադրվել։ Այս պատճառով սառեցված ակտիվների թեման լուրջ կքննարկվի։ Այստեղ կան դրական և բացասական կողմեր, ռիսկեր նույնպես։ Անընդունելի կլինի, եթե նույնիսկ հրադադարի կամ խաղաղության պայմանագրի ստորագրումից հետո այդ գումարները վերադարձվեն Ռուսաստանին՝ առանց ռեպարացիաների վճարման։ Մերձավոր Արևելքի մասին էլ կխոսենք, քանի որ այնտեղ նույնպես շատ բան է կատարվում։ Կքննարկենք Գազայի հումանիտար իրավիճակը», – նշել է Կայա Կալլասը։
