Թբիլիսիի քաղաքապետ Կախա Կալաձեն հանդիպել է Վրաստանում Իսրայելի արտակարգ և լիազոր դեսպան Վալիդ Աբու Հայային։ Այս մասին տեղեկացնում է Թբիլիսիի քաղաքապետարանի մամուլի ծառայությունը։

Նրանց հաղորդմամբ՝ քաղաքապետարանում անցկացված ճանաչողական հանդիպման ընթացքում քննարկվել են Վրաստանի և Իսրայելի միջև գոյություն ունեցող դրական հարաբերությունների հետագա խորացման հեռանկարները։ Քաղաքապետ Կալաձեն հույս է հայտնել, որ այս հանդիպումը զգալի ներդրում կունենա այդ հարցում։

«Մեր բարեկամությունը արդեն 26 դար ունի։ Իսրայելը շատ թանկ է Վրաստանի համար, և վստահ եմ, որ դուք մեծ դեր կունենաք մեր հարաբերությունների խորացման հարցում։ Ցանկանում եմ հաջողություն մաղթել։ Մենք բաց ենք համագործակցության համար։ Կարող եք ցանկացած թեմայով անմիջապես ինձ դիմել», – ասել է Կալաձեն։

Իր հերթին Իսրայելի դեսպան Վալիդ Աբու Հայան շնորհավորել է Կախա Կալաձեին Թբիլիսիի քաղաքապետի պաշտոնում երրորդ անգամ ընտրվելու կապակցությամբ և մաղթել հաջողություններ հետագա գործունեության մեջ։

«Շնորհավորում եմ ընտրություններում հաղթանակի կապակցությամբ։ Շատ կցանկանայի, որ ժամանակ գտնեք և պաշտոնական այցով այցելեք Իսրայել։ Վստահ եմ, որ Երուսաղեմի, Թել Ավիվի և մեր մյուս քաղաքների քաղաքապետերը ուրախ կլինեն ձեր այցով։ Երբ ուսումնասիրում եմ Թբիլիսին, մեծ նմանություն եմ տեսնում Երուսաղեմի հետ՝ մշակութային և պատմական տեսանկյունից։ Մեր քաղաքների միջև հարաբերությունների մեծ ներուժ կա։ Թել Ավիվը զարգացած, նորարարական և բարձր տեխնոլոգիական քաղաք է։ Վստահ եմ, որ համագործակցության բազմաթիվ համատեղ կետեր կգտնենք։ Ուրախ եմ, որ այստեղ եմ, քանի որ Թբիլիսիում ինձ զգում եմ ինչպես տանը», – նշել է դեսպանը։

Հանդիպման ընթացքում երկու կողմերն էլ արտահայտել են լիակատար պատրաստակամություն համագործակցության և բարեկամության համար։