Թբիլիսիի քաղաքապետ Կախա Կալաձեն կրկին անդրադարձել է «Ազգային շարժման» անդամների այցերին Վաշինգտոն և «Լելո» կուսակցության անդամների այցերին Բրյուսել։

Լրագրողների համապատասխան հարցին ի պատասխան՝ նա նշել է, որ ընդդիմադիրների այդ այցերը ևս մեկ անգամ ապացուցում են, որ նրանք ղեկավարվում են արտասահմանից և ստանում հանձնարարականներ՝ թե ինչպես պետք է գործեն։

«Սա ևս մեկ անգամ ապացուցում է, որ այդ մարդկանց ոչ մի կապ չունեն Վրաստանի կամ վրացիների հետ։ Ակնհայտ է, որ նրանք ղեկավարվում են դրսից, ունեն իրենց տերերը։ Մենք այցելում ենք և ամեն օր հանդիպում ենք ընտրողներին, ներկայացնում ենք այն նախագծերը, որոնք առաջիկա չորս տարում իրականացնելու ենք։ Իսկ նրանք արտասահմանում հանդիպում են իրենց տերերին։ Հավանաբար, այնտեղ ցուցումներ են ստանում՝ ինչպես պետք է գործեն։ Սա է տարբերությունը՝ «Վրացական երազանք – ժողովրդավարական Վրաստան» կուսակցությունը ծառայում է և խոսում է վրաց ժողովրդի հետ, ինչը ամենակարևորն է, կատարում է ազգային գործ։ Մինչդեռ նրանց գործողություններն ու մտադրությունները երկրի հանդեպ հասարակությունը լավ տեսնում է։ Վրաց ժողովուրդը ամեն ինչ հստակ գնահատում է, և ինչպես խորհրդարանական ընտրությունների ժամանակ արդեն վճիռ կայացրեց նրանց վերաբերյալ, նույնը կլինի նաև տեղական ինքնակառավարման ընտրություններին», – հայտարարել է Կախա Կալաձեն։