Վրաստանում ամեն ինչ ակնհայտ է. այստեղ կա «ակացուկեների» խումբ՝ բռնարարներ, ովքեր ամեն օր վիրավորում են այս երկրի քաղաքացիներին։ Նկարեք և ցույց տվեք նրանց գործողությունները, և զուգահեռը շատ պարզ է։ Այս մասին լրագրողների հետ զրույցում հայտարարել է Թբիլիսիի քաղաքապետ Կախա Կալաձեն։

Լրագրողները Կալաձեին հարց են ուղղել ԱՄՆ նախագահ Դոնալդ Թրամփի որոշման վերաբերյալ՝ «Անտիֆա» շարժումը որպես ահաբեկչական կազմակերպություն ճանաչելու մասին, և հետաքրքրվել՝ արդյոք հնարավոր է նման որոշում ընդունվի նաև Վրաստանում։ Ի պատասխան Կալաձեն նշել է․

«Չեմ կարող ասել, կտեսնենք։ Մենք բազմիցս խոսել ենք ու հայտարարություններ արել այն մասին, որ այս բռնի խմբերը, որոնք գործում են երկրում, սնվում են դրսից, ֆինանսավորվում են դրսից։ Ամբողջ պատասխանատվությամբ, 110-150% վստահությամբ ասում եմ, որ նրանք խրախուսվում են դրսից։ Այս ամենին ներգրավված են օտարերկրյա դիվանագետներ, հնարավոր է՝ նույնիսկ դեսպաններ, դուք գիտեք նրանց հայտարարությունները և գործողությունները։ Այդ իսկ պատճառով անհրաժեշտ է այս ամենը դադարեցնել»։

Միևնույն ժամանակ Կալաձեն նշել է, որ մեծ վիրավորանք է, երբ դիվանագետները կոպիտ միջամտում են երկրի ներքին քաղաքական գործերին։

«Սա շատ մեծ վիրավորանք է։ Դիվանագետը, որի գործողությունների շրջանակը սահմանված է, չունի որևէ իրավունք միջամտելու այլ երկրի ներքին քաղաքականությանը։ Ավելի մեծ դժբախտություն է, երբ խրախուսվում է ծայրահեղականությունը, ատելությունը, երբ խրախուսվում է որևէ չարիք։ Ինչը տեսնում ենք՝ այս ատելությունն ու բռնի խմբերը ամբողջությամբ ֆինանսավորվում են դրսից», – նշել է Կալաձեն։