Վրաստանի կառավարությունը, ազգային բանկը և մասնավոր բանկերը, կորոնավարակի տարածմամբ զբոսաշրջության ոլորտին հասցված վնասը նվազեցնելու կապակցությամբ, իրականացնելու են համակարգված քայլեր,- պայմանավորվածությունն այս մասին ձեռք է բերվել Վրաստանի վարչապետ Գիորգի Գախարիայի և մասնավոր բանկերի ղեկավարների միջև կայացած հանդիպմանը:

Ըստ Վրաստանի վարչապետի մամուլի ծառայության, հանդիպման ձևաչափում քննարկվել են նոր կորոնավարակի տնտեսական ազդեցությունը, մասնավորապես այդ վարակի հանդեպ ամենա խոցելի ոլորտներից մեկի, զբոսաշրջությանը հասցված վնասը: Շեշտը դրվել է բանկային ոլորտի և պետության կողմից հատուկ քայլերի վրա, որ նվազագույնի հասցվի այդ ոլորտի տնտեսական վնասը:

Հանդիպմանը որոշվել է, որ ստեղծվելու է աշխատանքային գործուն մեխանիզմ, կառավարության տնտեսական թիմի, ազգային բանկի և բանկային հատվածի ներկայացուցիչների մասնակցությամբ,  որն առաջիկա օրերին կներկայացնի կոնկրետ քայլերի ծրագիր, զբոսաշրջության ոլորտին օժանդակելու համար:

Վարչապետը նշել է, որ Վրաստանի կառավարությունը բանկային հատվածին այս գործընթացում համարում է  հիմնական դաշնակիցներից մեկը և պատրաստ է արդյունավետ համագործակցության համար:

Բանկային ոլորտը պատրաստակամություն է հայտնել աջակցել զբոսաշրջության ոլորտին զանազան ձևերով, եթե զբոսաշրջության ​​ոլորտի ներկայացուցիչները, կորոնավարակի տարածման պատճառով, որոշակի խնդիրներ ունենան ընթացիկ վճարումների հետ կապված:

Հանդիպմանը կողմերը պայմանավորվել են, որ այսօր հիմնական խնդիրն է այդ հատվածներում հնարավորինս շատ դրամական ռեսուրս լինի, որպեսզի չդադարեցվեն ընթացիկ նախագծերը և այդ ուղղությամբ՝ պետությունը, ազգային բանկը և մասնավոր բանկերը կձեռնարկեն համապատասխան քայլեր:

Հանդիպմանը ներկա էին նաև կառավարության տնտեսական թիմի նախարարները և ազգային բանկի նախագահը: