Կառավարության աշխատակազմ. 2024 թվականի փետրվարի 8-ից հետո կառավարությունն ամբողջությամբ դադարեցրել է պետական գույքը խորհրդանշական գնով և ուղղակի ձևով օտարելու պրակտիկան, այն հավատարիմ կմնա այս սկզբունքին
Կոնկրետ լրատվամիջոցներ տարածել են կոպիտ մանիպուլյատիվ տեղեկատվություն, թե իբր Վրաստանի կառավարությունը խորհրդանշական գնով օտարել է Թբիլիսիում գտնվող «Սաքարթվելո» (Վրաստան) հյուրանոցի 3,237 քառակուսի մետր տարածքը,– այս մասին ասված է կառավարության աշխատակազմի տարածած հայտարարության մեջ։
Ինչպես նշվում է կառավարության աշխատակազմի հայտարարության մեջ, տարածքի օտարումն իրականացվել է ձևականորեն։
«Իրականում Վրաստանի կառավարության համապատասխան որոշմանը նույնիսկ մակերեսային ծանոթանալը բավական էր հասկանալու համար, որ տարածքի օտարումն իրականացվել է լիովին ձևականորեն։ «Սաքարթվելո» հյուրանոցի ամբողջական սեփականաշնորհումն իրականացվել է տարիներ առաջ, որից հետո դրա սեփականատերը մի քանի անգամ փոխվել է։ Վերջին դեպքում, «Սաքարթվելո» հյուրանոցի օտարման ժամանակ պարզվել է, որ առկա է փաստացի անճշտություն պետության կողմից տարիներ առաջ կազմված չափագրման գծագրում արձանագրված տարածքի և հյուրանոցի իրական տարածքի միջև։ Նշված անճշտությունը վերացնելու և արդարության սկզբունքը պաշտպանելու համար անճշտությանը համապատասխանող տարածքը՝ 3,237 քառակուսի մետրը, խորհրդանշական գնով և լիովին ձևականորեն փոխանցվել է հյուրանոցի սեփականատիրոջը՝ այնպես, որ նրա գույքի իրական ծավալը չի ավելացել։
Այս ամենը հաստատում է, որ կոնկրետ լրատվամիջոցներ կա՛մ չեն կարողացել պարզել պարզ ճշմարտությունը, կա՛մ լիովին գիտակցաբար տարածել են կոպիտ մանիպուլյատիվ տեղեկատվություն։
2024 թվականի փետրվարի 8-ից հետո Վրաստանի կառավարությունն ամբողջությամբ դադարեցրել է պետական գույքը խորհրդանշական գնով և ուղղակի ձևով օտարելու պրակտիկան և հավատարիմ կմնա այս սկզբունքին նաև ապագայում։ Կոչ ենք անում բոլոր լրատվամիջոցներին հետագայում ձեռնպահ մնալ սխալ ու կոպիտ մանիպուլյատիվ տեղեկատվություն տարածելուց և հանրությանը թյուրիմացության մեջ գցելուց»,– ասված է կառավարության աշխատակազմի հայտարարության մեջ։