Կանանց և երեխաների հարցերով խորհրդարանական ժամանակավոր հանձնաժողովն անցկացրել է իր առաջին դաշտային հանդիպումները։

Վրաստանի խորհրդարանի տվյալներով՝ հանձնաժողովի անդամները այցելել են Սամցխե-Ջավախեթիի շրջանի Ախալցիխեի թիվ 7 դպրոց, որտեղ գործում է հատուկ կարիքներ ունեցող երեխաների համար նախատեսված ամառային գիշերօթիկ դպրոց։

Հանձնաժողովի անդամները զննել են աշակերտների սննդի և խնամքի համար նախատեսված տարածքները և զրուցել գիշերօթիկի մանկավարժների հետ։

«Դաշտային հանդիպումների նպատակն է տեղում ծանոթանալ այն մարտահրավերներին և կարիքներին, որոնց վրա կենտրոնացած է Կանանց և երեխաների հարցերով խորհրդարանական ժամանակավոր հանձնաժողովը։ Առաջին հերթին, դա երեխաների իրավունքների պաշտպանությունն է, և այս առումով հատուկ շեշտադրում է դրվում նրանց իրավունքների վրա թվային տարածքում։ Կարևոր է նաև կանանց քաղաքականապես հզորացնելը և ժողովրդագրական խնդիրների լուծումը։ Համապատասխանաբար, դաշտային հանդիպումների ձևաչափով մենք կայցելենք հատուկ կարիքներ և հաշմանդամություն ունեցող երեխաների համար նախատեսված հաստատություններ, որտեղ կծանոթանանք նրանց կարիքներին», – ասել է հանձնաժողովի նախագահ Մարիամ Լաշխին։

Դաշտային հանդիպումների շրջանակներում հանձնաժողովի անդամները Ախալցիխեի մունիցիպալիտետի սակրեբուլոյի շենքում հանդիպում են անցկացրել Կանանց և երեխաների խորհրդի անդամների և տեղական ինքնակառավարման մարմինների ներկայացուցիչների հետ։ Օրենսդիրները խորհրդի անդամներին ներկայացրել են նորաստեղծ հանձնաժողովի կանոնադրությունը և գործունեության հիմնական ոլորտները։

«Մենք Ախալցիխեի կանանց և երեխաների խորհրդի անդամների հետ քննարկել ենք կանանց և երեխաների կարիքներին վերաբերող հարցեր։ Հանդիպման ժամանակ քննարկել ենք տեղական մունիցիպալիտետների մակարդակով պատրաստված դրույթներն ու ռազմավարական փաստաթղթերը։ Խորհրդի անդամներին ներկայացրել ենք հանձնաժողովի առաջնահերթ ոլորտները և խոսել գործողությունների ծրագրով նախատեսված միջոցառումների մասին։ Հանդիպման ժամանակ քննարկման ձևաչափով քննարկել ենք, թե ինչպես կարող ենք համատեղ աշխատել երեխաների և կանանց հարցերի շուրջ», – ասել է խորհրդարանի փոխխոսնակ Նինո Ծիլոսանին։

Մարիամ Լաշխին, Նինո Ծիլոսանին, Էկա Սեփաշվիլին և Վլադիմիր Բոժաձեն մասնակցում են կանանց և երեխաների հարցերով զբաղվող ժամանակավոր խորհրդարանական հանձնաժողովի դաշտային հանդիպումներին։