Իտալիայի վարչապետը սխալ է անվանել ԱՄՆ-ի կողմից եվրոպական երկրների նկատմամբ մաքսատուրքեր սահմանելու սպառնալիքը։ Իտալիայի կառավարության ղեկավարը այս մասին հայտարարություն է արել Սեուլում։

Նրա խոսքով՝ ինքը խոսել է ԱՄՆ նախագահի հետ և կարծում է, որ Գրենլանդիայի շուրջ ստեղծված իրավիճակը բավարար չափով պարզ հաղորդակցության արդյունք է։

«Ես սխալ եմ համարում մաքսատուրքերի սահմանումը այն երկրների նկատմամբ, որոնք որոշել են ներդրում ունենալ Գրենլանդիայի անվտանգությանը, և ես չեմ կիսում նման մոտեցումը։ Ես խոսել եմ Դոնալդ Թրամփի հետ և ասել նրան դա։ Ես նաև խոսել եմ ՆԱՏՕ-ի գլխավոր քարտուղարի հետ և մտադիր եմ խոսել մեր եվրոպացի գործընկերների հետ։ Կա թյուրըմբռնման և հաղորդակցության խնդիր, քանի որ եվրոպական երկրների կողմից Գրենլանդիա զորքեր ուղարկելու նախաձեռնությունը չպետք է դիտարկվի հակաամերիկյան համատեքստում», – ասաց Ջորջիա Մելոնին։

Նրա խոսքով՝ Գրենլանդիայի շուրջ ստեղծված իրավիճակը պետք է դիտարկվի ՆԱՏՕ-ի շրջանակներում։ Իտալիայի կառավարության ղեկավարի խոսքով՝ նա կիսում է ԱՄՆ-ի մտահոգությունները Արկտիկական տարածաշրջանում ստեղծված իրավիճակի վերաբերյալ։ Նրա խոսքով՝ այս տարածաշրջանը ռազմավարական առումով կարևոր է։

«Մենք պետք է համատեղ աշխատենք, վերադառնանք երկխոսության և խուսափենք սրացումից», – ասաց Իտալիայի վարչապետը։

Տեղեկության համար՝ Դոնալդ Թրամփը հայտարարել է, որ առևտրային մաքսատուրքեր կսահմանի բոլոր այն երկրների համար, որոնք աջակցում են Դանիայի տարածքային ամբողջականությանը և իրենց զինվորականներն են ուղարկել Գրենլանդիա։ ԱՄՆ նախագահի խոսքով՝ փետրվարի 1-ից Դանիայի, Շվեդիայի, Ֆրանսիայի, Գերմանիայի, Նիդեռլանդների, Ֆինլանդիայի, Նորվեգիայի և Մեծ Բրիտանիայի համար կսահմանվեն 10% մաքսատուրքեր։ Նա նաև ասաց, որ եթե Գրենլանդիայի հարցի շուրջ համաձայնության չհասնեն, ապա հունիսի 1-ից մաքսատուրքերը կբարձրանան մինչև 25%։ Վաշինգտոնը պնդում է, որ մաքսատուրքերը կմնան ուժի մեջ մինչև Գրենլանդիայի փոխանցումը ԱՄՆ-ին։ Թրամփը նշում է, որ կղզու տիրապետությունը կարևոր է ԱՄՆ ազգային անվտանգության համար։ Մասնավորապես՝ ԱՄՆ նախագահը նշում է, որ տարածքը անհրաժեշտ է հրթիռային հարձակումներից պաշտպանվելու համար նախատեսված նոր համակարգի՝ «Ոսկե գմբեթի» արդյունավետ գործունեության համար։