Ջոն Քիրբի. Իսրայելն իրավունք ունի պատասխանել Գոլանի բարձունքների վրա հարձակմանը
Սպիտակ տունը նշում է, որ Իսրայելն իրավունք ունի պատասխանել Գոլանի բարձունքների վրա հարձակմանը։ Այս մասին լրագրողներին հայտնել է Սպիտակ տան ազգային անվտանգության խոսնակ Ջոն Քիրբին՝ հավելելով, որ ԱՄՆ-ը բացարձակապես դատապարտում է տեղի ունեցածը։
Ջոն Քիրբիի խոսքով՝ հարձակումն իրականացրել է Հեզբոլլահը, թեև ինքը՝ Հեզբոլլահը, հերքում է դա։
«Սա նրանց հրթիռն է։ Այն արձակվել է իրենց վերահսկողության տակ գտնվող տարածքից»,- ասուլիսում ասել է Քիրբին։
Սպիտակ տան ազգային անվտանգության ներկայացուցչի խոսքով՝ Միացյալ Նահանգները կարծում է, որ դիվանագիտական լուծման համար դեռ ժամանակ և տարածք կա: Նա հավելել է, որ շարունակական քննարկումների մեջ է իր իսրայելցի և լիբանանցի գործընկերների հետ։
«Մեր աջակցությունն Իսրայելի անվտանգությանն ամուր է։ Ոչ մի ժողովուրդ չի կարող հանդուրժել նման լուրջ սպառնալիքները, որոնց բախվում են իսրայելցիները», – ասել է Սպիտակ տան ազգային անվտանգության խոսնակը։
Վերջին տվյալներով՝ Գոլանի բարձունքների հյուսիսային հատվածում օդային հարձակման հետևանքով զոհվել է առնվազն 12 մարդ, այդ թվում՝ երեխաներ։ Մոտ 30 մարդ վիրավորվել է։ Իսրայելի պաշտպանության բանակը հայտնել է, որ հրթիռն ընկել է ֆուտբոլի դաշտի վրա, որտեղ երեխաները խաղում էին: Իսրայելը կատարվածի համար մեղադրում է Հեզբոլլահին , ինչը Հեզբոլլահը կտրականապես հերքում է։