«44-օրյա պատերազմի ընթացքում Ֆրանսիայի նախագահ Էմանուել Մակրոնը մի քանի անգամ զանգահարել է Իլհամ Ալիևին և սպառնացել նրան», – այս մասին հայտարարել է Ադրբեջանի արտգործնախարար Ջեյհուն Բայրամովը՝ Ադրբեջանի հանրային հեռուստաընկերությանը տված հարցազրույցում։

Ադրբեջանի ԱԳՆ ղեկավարի խոսքով՝ պատերազմի սկսումից հետո Ադրբեջանի վրա սկսվել է քաղաքական և դիվանագիտական ճնշում, և երբ Բաքուն սկսել է ռազմական հաջողություններ գրանցել, այդ ճնշումը բազմապատկվել է՝ հասնելով նույնիսկ սպառնալիքների մակարդակի։

«Ֆրանսիայի նախագահն ասաց՝ “պետք է անմիջապես դադարեցնեք [ռազմական գործողությունները]”։ Մակրոնը հայտարարեց, որ եթե դա չկատարվի, Ֆրանսիան կճանաչի Լեռնային Ղարաբաղը։ Նա անմիջապես պատասխան ստացավ Ադրբեջանի նախագահից, որը հստակ նշեց, որ ֆրանսիական կողմը կարող է դա անել, սակայն դա մեզ համար ոչինչ չի փոխի։ Նրանք կարող էին վստահ լինել, որ Ադրբեջանը կդադարեցնի դիվանագիտական հարաբերությունները Ֆրանսիայի հետ», – ասել է Բայրամովը։

Նրա խոսքով՝ 2018 թվականին Բաքուն հույս ուներ, որ Նիկոլ Փաշինյանի ղեկավարած Հայաստանի նոր կառավարությունն ավելի կառուցողական կգտնվի, սակայն այդ հույսերը շուտով մարեցին՝ հայկական կողմի կողմից շարունակական ռազմական և քաղաքական սադրանքների պատճառով։

Բայրամովը նաև բացահայտել է խաղաղ բանակցությունների ժամանակ Ռուսաստանի կողմից ներկայացված գաղտնի ծրագիրը՝ նշելով, որ եթե այն ընդունվեր, դա ամեն ինչի ավարտը կլիներ․ իրավիճակը կսառեցվեր, և ադրբեջանական տարածքների ազատագրումը կդառնար անհնարին։

«Երբ սկսվեցին բանակցությունները, Ռուսաստանի ԱԳ նախարար Սերգեյ Լավրովը կողմերին ներկայացրեց մի փաստաթուղթ՝ պատրաստ հրադադարի համաձայնագիր։ Այն նախատեսում էր բոլոր ռազմական գործողությունների դադարեցում հոկտեմբերի 9-ի կեսգիշերից։ Ռուս խաղաղապահները պետք է տեղակայվեին շփման գծի արևելյան հատվածում՝ Ադրբեջանի բանակի կողքին, իսկ ռուս խաղաղապահներն ու հայկական զինված ուժերը՝ արևմտյան հատվածում։ Այլ կերպ ասած՝ առանց օկուպացված տարածքներից հայկական ուժերի դուրսբերման և առանց որևէ լրացուցիչ պայմանների՝ տարածաշրջանում պետք է տեղակայվեին ռուս խաղաղապահներ», – ընդգծել է Ջեյհուն Բայրամովը։