Իրանի հոգևոր առաջնորդ Մոջթաբա Խամենեին հայտարարում է, որ տարբերվող տեսակետներ ունենալուց հանդերձ, ընդունել է ԱՄՆ-Իրան խաղաղության համաձայնագիրը։

Իրանի հոգևոր առաջնորդն այս անգամ նույնպես համապատասխան հայտարարությունն արել է գրավոր ձևով, որը տարածել է Իրանի պետական լրատվամիջոցը։

Նամակի համաձայն՝ Խամենեին սկզբում համաձայն չի եղել փոխըմբռնման հուշագրին, սակայն Իրանի նախագահ Մասուդ Փեզեշքիանի երաշխիքներից հետո թույլատրել է դրա իրագործումը։

Բացի այդ, հոգևոր առաջնորդը նշում է, որ համաձայնության հասնելու համար «հուսահատված Դոնալդ Թրամփն օգտագործել է բոլոր տեսակի լծակները»։

«Ինչպես հայտնի է, Իրանի և Ամերիկայի Միացյալ Նահանգների նախագահների միջև ստորագրվել է փոխըմբռնման հուշագիր։ Այս փուլին հասնելու ճանապարհին Իրանի իշխանությունները կարեկցանքով ու բարի կամքով մեծ ջանքեր են գործադրել, և, իհարկե, հենց Ամերիկայի Միացյալ Նահանգների նախագահն էր նա, ով հուսահատությունից դրդված օգտագործեց բոլոր տեսակի լծակներն այս նպատակով։ Սկզբունքորեն ես այլ դիրքորոշում ունեի, սակայն այն պարտավորության պատճառով, որը հարգարժան նախագահը՝ որպես Ազգային անվտանգության գերագույն խորհրդի նախագահ, իր և մյուս անդամների անունից տվեց ինձ՝ իրանցի ժողովրդի և Դիմադրության ճակատի իրավունքները պաշտպանելու համար, և հայտարարեց, որ կստանձնի պատասխանատվությունը, ես նրան տվեցի թույլտվություն»,- ասված է հայտարարության մեջ։

Նամակում հոգևոր առաջնորդը նաև նշում է, որ Թեհրանը սպասում է Վաշինգտոնի կողմից պայմանների կատարմանը, և եթե ապագայում ԱՄՆ-ի և Իրանի առաջնորդների միջև դեմ առ դեմ բանակցություններ կայանան, դա չի նշանակում, որ «Թեհրանը կիսում է թշնամու տեսակետը»։