Վրաստանի վարչապետ Իրակլի Կոբախիձեն հանդիպել է Վրաստանում գործող խոշոր վառելիքային ընկերությունների ներկայացուցիչների հետ՝ սննդամթերքի գների հարցերով կառավարական համակարգող հանձնաժողովի շրջանակներում։

Վրաստանի վարչապետի մամուլի ծառայության հաղորդմամբ, հանձնաժողովի նիստում քննարկվել են Վրաստանում վառելիքի ներկայիս գները և դրանց հնարավոր նվազեցման ռեսուրսները։

Նշվել է, որ, ի տարբերություն սննդամթերքի, վառելիքի գները Վրաստանում շատ ավելի ցածր են, քան եվրոպական երկրներում, ինչը, ի թիվս այլ բաների, պայմանավորված է նրանով, որ Վրաստանում ակցիզային հարկը մոտավորապես երեք անգամ ցածր է եվրոպական երկրներում սահմանված համապատասխան հարկից, չնայած դրան, հնարավոր է որոշակի քննարկում գների հնարավոր նվազեցման վերաբերյալ։

Կառավարության ղեկավարը լսել է վառելիքային ընկերությունների ներկայացուցիչների կարծիքները այն մասին, թե ինչպես են նրանք գնահատում շուկայում առկա իրավիճակը, մատակարարման շղթայի գործունեությունը, ինչպես նաև գնագոյացման մեխանիզմը։

Հանդիպումն անցել է քննարկման ձևաչափով։ Կողմերը համաձայնել են, որ երկխոսությունը կշարունակվի աշխատանքային ռեժիմով։

Սննդամթերքի, դեղորայքի և վառելիքի գների վերաբերյալ քննարկումը հաջորդ շաբաթվանից կտեղափոխվի խորհրդարանական հանձնաժողովի ձևաչափ։