Վրաստանի վարչապետ Իրակլի Կոբախիձեն հանդիպել է Արաբական Միացյալ Էմիրությունների նախագահ շեյխ Մոհամեդ բին Զայեդ Ալ Նահայանին։ Այս մասին հայտնում է Վրաստանի կառավարության վարչակազմը։
Ըստ պաշտոնական աղբյուրի՝ հանդիպման ընթացքում ուշադրություն է դարձվել Վրաստանի և Արաբական Միացյալ Էմիրությունների միջև քաղաքական և տնտեսական համագործակցության զարգացման դրական դինամիկային։
Կառավարության ղեկավարը կարևորել է շեյխ Մոհամեդ բին Զայեդ Ալ Նահայանի այցը՝ նշելով, որ այն նպաստելու է երկու երկրների միջև գործընկերության հետագա խորացմանը։
«Այսօր մեր համար առանձնահատուկ կարևորության օր է։ Առաջին անգամ հյուրընկալում ենք Արաբական Միացյալ Էմիրությունների պատվիրակությանը նախագահի գլխավորությամբ, ինչը մեծ պատիվ է մեզ համար։ Կրկին անկեղծ շնորհակալություն եմ հայտնում Ձեր այցի համար։ Ձեր ներկայությունը Վրաստանում մեր հանդեպ ունեցած հետաքրքրության վկայություն է, ինչը մենք բարձր ենք գնահատում։ Մեր հարաբերություններում առկա է շատ դրական դինամիկա, սերտ քաղաքական և տնտեսական համագործակցություն։ Մենք առավելագույնս շահագրգռված ենք բոլոր ուղղություններով ավելի խորացնել համագործակցությունը և գործընկերությունը մեր երկու երկրների միջև։ Ուրախ ենք, որ Ձեր երկրից ընկերությունները շատ ակտիվ ներկայացված են Վրաստանում։ Այստեղ հաջողությամբ գործում են չորս խոշոր ընկերություններ՝ ապահովված տնտեսական գործունեության բոլոր պայմաններով։ Ուրախ ենք նաև, որ Ձեր առաջնորդությամբ ստորագրել ենք խիստ կարևոր ներդրումային համաձայնագիր, որը նախատեսում է Վրաստանում տնտեսական գործունեություն Eagle Hills և EMAAR ընկերությունների կողմից։ Շնորհակալություն Ձեր աջակցությանը։ Այս նախաձեռնությունը շատ կարևոր է մեզ համար։ Բարձր ենք գնահատում նաև համագործակցությունը, որն ուղղված է Թբիլիսիում չոր նավահանգստի զարգացմանը։ Հուսով ենք, որ նման նախաձեռնությունները կշարունակվեն, և մեր երկրների միջև քաղաքական ու տնտեսական համագործակցությունը կշարունակի խորանալ։ Ձեր այցը ամուր հիմք կդնի հետագա արդյունավետ համագործակցության համար բոլոր ուղղություններով։ Կրկին շնորհակալություն եմ հայտնում Ձեր այցի համար։ Այս օրը մեծ նշանակություն ունի մեր երկրի և յուրաքանչյուրիս համար», – հայտարարել է Իրակլի Կոբախիձեն։
Արաբական Միացյալ Էմիրությունների նախագահը ևս շեշտել է Վրաստանի և ԱՄԷ-ի միջև տարբեր ոլորտներում սերտ համագործակցությունը։ Շեյխ Մոհամեդ բին Զայեդ Ալ Նահայանը կարևորել է առևտրային կապերի աճող դինամիկան և երկու երկրների ընդհանուր տեսլականը՝ խաղաղության և կայունության հարցերում։
«Սիրելի ընկեր, պարոն վարչապետ, շատ ուրախ եմ Վրաստան այցելելու համար։ Աբու Դաբիում հանդիպումից հետո նորից ձեզ հանդիպելը մեր համագործակցության շարունակության ապացույց է։ Օգտվելով առիթից՝ շնորհավորում եմ ձեր ծննդյան օրը։ Մաղթում եմ հաջողություն, երջանիկ կյանք և առողջություն։ Վրաստանի և Արաբական Միացյալ Էմիրությունների միջև սերտ կապեր կան։ Առաջիկայում այս կապերը կխորանան՝ նոր նախագծերի իրականացման շնորհիվ, հատկապես առևտրի, բիզնեսի, տնտեսության, արդյունաբերության և էներգետիկայի ոլորտներում, ինչպես նաև այն ոլորտներում, որոնք առաջնահերթություն ունեն երկու երկրների համար։ Կցանկանայի նշել առևտրային հարաբերությունների աճը մեր երկրների միջև, որը հասնում է միլիոնավոր դոլարների։ Այս համագործակցությունը ընդգրկում է մեծ ծավալներ, և կասկած չկա, որ տնտեսական համագործակցությունը կշարունակվի, հատկապես՝ տրանսպորտի ոլորտում։ Արաբական Միացյալ Էմիրությունները կաջակցի պայմանագրերով նախատեսված նախագծերի զարգացմանը, որոնք իրականացվում են տարբեր ներդրումային ընկերությունների կողմից։ Սա ուժեղացնում է Վրաստանի և ԱՄԷ-ի միջև հարաբերությունները։ Մեր երկրները ունեն ընդհանուր տեսլական կայունության, խաղաղության և մարդկային հարաբերությունների ուղղությամբ։ Երկու երկրներն էլ մասնակցում են մշակութային ոլորտում համագործակցության խորացմանը և հարուստ ժառանգության փոխանակմանը, ինչը հիմք է հանդիսանում մեր երկրների զարգացման համար։ Ուզում եմ հաստատել, որ ԱՄԷ-ն կշարունակի ամրապնդել գործընկերությունը Կովկասյան տարածաշրջանի երկրների հետ և կխթանի կայունությունը, խաղաղությունը և ընդհանուր շահերը։ Խաղաղությունը տնտեսության զարգացման և ամրապնդման առանցքային հենասյունն է։ Կրկին շնորհակալություն եմ հայտնում և մաղթում Վրաստանին և վրաց ժողովրդին կայունություն, զարգացում և հաջողություն», – նշել է շեյխ Մոհամեդ բին Զայեդ Ալ Նահայանը։
Կառավարության վարչակազմում տեղի ունեցած ընդլայնված ձևաչափով հանդիպմանը մասնակցել են երկու երկրների նախարարների կաբինետի անդամները։
Հանդիպման ավարտին Վրաստանի էկոնոմիկայի և կայուն զարգացման նախարար Մարիամ Քվրիվիշվիլին և Eagle Hills Group-ի հիմնադիր ու նախագահ Մոհամեդ Ալաբարը փոխանակել են համաձայնագրեր, որոնք նախատեսում են Վրաստանում երկու խոշոր ներդրումային նախագծերի իրականացում՝ 6 միլիարդ ԱՄՆ դոլարի չափով։
Պաշտոնական փաստաթղթերի փոխանակման արարողությանը մասնակցել են Վրաստանի վարչապետ Իրակլի Կոբախիձեն և Արաբական Միացյալ Էմիրությունների նախագահ շեյխ Մոհամեդ բին Զայեդ Ալ Նահայանը։
