Միխեիլ Սաակաշվիլիին ձերբակալելու հատուկ գործողությունը ով գիտեր, ով ոչ, ով երբ իմացավ և այլն, կարևոր չէ, գլխավորն այն է, որ գործողությունը հաջողությամբ պլանավորվեց, և արդյունքն այն է, որ Միխեիլ Սաակաշվիլին այնտեղ է, որտեղ այսօր է, որտեղ նրա տեղն է, – Վրաստանի նախկին նախագահ Միխեիլ Սաակաշվիլիի ձերբակալության մասին ասաց «Վրացական երազանք» կուսակցության նախագահ Իրակլի Կոբախիձեն:

Նրա խոսքով, Սաակաշվիլին Վրաստան էր եկել ռուսական գործ կատարելու համար:

«Միխեիլ Սաակաշվիլին ինը տարի զբաղվում է ռուսական գործով, նա մեր երկրի տարածքների 20 տոկոսը հանձնել է Ռուսաստանի Դաշնությանը, ինչպես նաեւ ռազմավարական տնտեսական օբյեկտները եւ այլն: Ինը տարի ընդդիմադիր աշխատելիս նա ռուսական աշխատանք էր կատարում: Այսօր էլ նա Վրաստան էր եկել ռուսական գործ կատարելու: Բոլորը դա շատ լավ գիտեն: Հետեւաբար, երբ խոսքը վերաբերում է ռուսական գործին, մենք պետք է այս ամենը հարցնենք Սաակաշվիլին:

Բոլորը շատ լավ գիտեն, թե ինչ հանցագործություններ է կատարել Միխեիլ Սաակաշվիլին: Մենք թույլ չտվեցինք «Ազգային շարժմանը» պատկանող հեռուստաընկերություններին երեկ նույնիսկ մի քանի ժամով անկարգություններ առաջացնել: «Ազգային շարժումն» իր հեռուստատեսություններով փորձեց ստեղծել նախահեղափոխական տրամադրություն, ինչը թույլ չտրվեց: Հետևաբար, ձեր առաջնորդը այնտեղ է, որտեղ պետք է լինի: Միխեիլ Սաակաշվիլիի մասին բոլորը գիտեն ամեն ինչ: Նա նախազգուշացվել է, այդ թվում՝ միջազգային գործընկերների կողմից, չմտնել երկիր, չնայած նա ոչ ոքի չի լսել: Նա շատ լուրջ հանցագործ է, և նա կպատժվի այս ծանր հանցագործության համար», – ասել է Կոբախիձեն:

Նա մեկնաբանել է նաեւ Ուկրաինայի նախագահ Վլադիմիր Զելենսկու հայտարարությունը Միխեիլ Սաակաշվիլիի ձերբակալության վերաբերյալ:

«Մենք կբացատրենք գործողության բոլոր մանրամասները, թե ինչպես է նա ձերբակալվել: Մենք կարող ենք մանրամասն տեղեկատվություն տրամադրել», – ասել է Կոբախիձեն:

Ինչ վերաբերում է Սաակաշվիլիին ձերբակալելու գործողությանը, Կոբախիձեն ասել է, որ իրավապահ մարմինները վերահսկում էին ամեն ինչ՝ Կիեւից մինչեւ Սանզոնա:

«Հետեւաբար, այս գործողությունն արդյունավետ էր: Սաակաշվիլիի բանտարկությունից ուշադրության կենտրոնի տեղափոխումը գործողության, անիմաստ փորձ է՝ համոզել կուսակցության համակիրներին, որ կուսակցության առաջնորդը կալանավորված է: Չի ստացվի, «Ազգային շարժումը» կազմալուծված է, քանի որ ձերբակալել են իրենց առաջնորդին, որը սպառնում էր տապալել իշխանությունը: Այսօր հասարակության համար կարեւոր է ակտիվ լինելն ու վերջ դնել «Ազգային շարժմանը»: Առաջիկա երեք տարիները պետք է հանգիստ լինեն՝ առանց «Ազգային շարժման» անկարգությունների և Սաակաշվիլիի», – ասել է Կոբախիձեն: