Պետական համալսարաններում անվճար կրթությունը լիովին սոցիալական հարց է և այնքան էլ կապված չէ կրթության նպատակների հետ, որքան այն աջակցությունն է, որը տրամադրվում է ուսանողներին։ Այս մասին հայտարարել է Վրաստանի վարչապետ Իրակլի Կոբախիձեն այսօր կայացած բրիֆինգի ընթացքում։

Վարչապետի խոսքով՝ բարձրագույն կրթության անվճար դարձնելու հիմնական նպատակն ունի սոցիալական բնույթ։

«Բարձրացված հարցերից մեկը կապված էր այն խնդրի հետ, որ ուսանողները չեն կարողանում վճարել ուսման վարձը և այդ պատճառով կասեցված կարգավիճակ ունեն և այլն։ Այժմ այլևս երբեք չենք ունենա կասեցված կարգավիճակով ուսանողներ։ Գլխավոր հարցը սոցիալական է։ Մենք ուսանողների ուսման վարձը վճարում ենք պետական բյուջեից՝ ապահովելու նրանց սոցիալական աջակցությունը։ Սա է գլխավոր նպատակը։ Ինչ վերաբերում է երկրորդ կողմին՝ կրթության որակի բարձրացմանը, ապա ամբողջությամբ մեր ներկայացրած հայեցակարգը ծառայում է հենց այդ նպատակին։ Մենք ցանկանում ենք, որ կրթությունը լինի և՛ անվճար, և՛ որակյալ», – նշել է վարչապետը։