Վրաստանի վարչապետ Իրակլի Կոբախիձեն հայտարարել է, որ եթե աշակերտը ցանկանա ավարտել 12-րդ դասարանը և շարունակել ուսումը արտերկրում, բոլոր անհրաժեշտ պայմանները կապահովվեն դրա համար։

Նրա խոսքով՝ մասնավոր դպրոցները կկարողանան պահպանել 12-ամյա ուսումնական ծրագիրը, իսկ հասարակական (պետական) դպրոցներում կստեղծվեն հատուկ դասարաններ այն աշակերտների համար, ովքեր ցանկանում են շարունակել ուսումը արտասահմանում։

«Աշակերտներին չի ստեղծվի որևէ արհեստական խոչընդոտ, և այդ առնչությամբ հնչող հայտարարությունները պարզապես սպեկուլյատիվ են։
Բնականաբար, պետք է վերանայվի ընդհանուր կրթության ծրագրի բովանդակությունը, և վերջին տարվա ծրագիրը պետք է առավելագույնս համապատասխանեցվի ընդունելության քննությունների պահանջներին։ Եթե 12 տարի ուսում առնելու անհրաժեշտություն չկա նպատակներին հասնելու համար, ապա ավելի նպատակահարմար է անցում կատարել 11-ամյա կրթական համակարգի», – նշել է Կոբախիձեն։

Նա նաև անդրադարձել է այն քննադատությանը, թե 11-ամյա կրթությամբ աշակերտները չեն կարողանա ընդունվել արտասահմանյան համալսարաններ՝ անմիջապես առաջին կուրսից։

«Սա ունի պարզ լուծում։ Սա չէ հարցի էությունը։ Գլխավորը չէ՝ 11, թե 12 տարի է լավ։ Բանն այն է, թե արդյոք կկարողանան արտերկիր մեկնել։ Մենք չենք խոչընդոտի այդ հնարավորությունը։
Պարզ է, որ արտագաղթը շատ թերություններ ունի։ Երբ աշակերտը մեկնում է արտերկիր սովորելու՝ առաջին կուրսից, նրանց մեծ մասը այլևս չի վերադառնում։ Այդ պատճառով արտերկիր մեկնելն ունի ավելի շատ բացասական կողմեր, սակայն, իհարկե, դա յուրաքանչյուր աշակերտի և ծնողի ընտրությունն է, և մենք չենք խառնվում։

Այս դեպքում ևս ամբողջական պայմաններ կլինեն։

Նախ՝ այս պահանջը չի վերաբերում մասնավոր դպրոցներին։

Երկրորդ՝ պետական դպրոցներում կստեղծվեն հատուկ դասարաններ 12-րդ դասարանի ցանկացողների համար, այդ թվում՝ Թբիլիսիում և այլ քաղաքներում։ Անհրաժեշտության դեպքում յուրաքանչյուր շրջանում կարող ենք ստեղծել նման դասարաններ։

Հետևաբար, բոլոր նրանք, ովքեր կցանկանան ավարտել 12-րդ դասարանը և ուսումը շարունակել արտերկրում՝ կստանան այդ հնարավորությունը, – ասել է Վրաստանի վարչապետը։