Հաշվի առնելով առկա քաղաքական և տնտեսական հարաբերությունները՝ Վրաստանը Ղրղզստանը համարում է ոչ միայն կարևոր և հուսալի գործընկեր, այլև բարեկամ պետություն,- այս մասին հայտարարել է Վրաստանի վարչապետ Իրակլի Կոբախիձեն Ղրղզստանի նախագահ Սադիր Ժապարովի հետ համատեղ ճեպազրույցի ժամանակ։

Ինչպես նշել է Կոբախիձեն, Ղրղզստան կատարած այսօրվա այցը նոր խթան կհաղորդի վրաց-ղրղզական երկկողմ հարաբերություններին։

«Ինձ համար մեծ պատիվ է այսօր գտնվել Ղրղզստանի Հանրապետությունում՝ պաշտոնական պատվիրակության հետ միասին։ Չնայած մեր ժողովուրդների և երկրների միջև առկա սերտ պատմական կապերին, ինչպես նշվեց, սա մեր երկրների միջև ամենաբարձր մակարդակի առաջին այցն է։ Հետևաբար, կարող ենք վստահորեն ասել, որ այս այցը պատմական է։

Հուսով եմ և վստահ եմ, որ այս այցը նոր թափ կհաղորդի Վրաստանի և Ղրղզստանի երկկողմ հարաբերություններին։ Մենք շատ հետաքրքիր, բովանդակալից զրույց ունեցանք երկկողմ հարաբերությունների վերաբերյալ, ինչպես նաև անդրադարձանք տարածաշրջանային և միջազգային օրակարգի տարբեր հարցերի։ Հատկանշական է, որ Ղրղզստանի նախագահի և իմ կողմից ստորագրվել է համատեղ հայտարարություն, ինչպես նաև երկկողմ փաստաթղթեր, որոնք կստեղծեն բարենպաստ պայմաններ ապագայում սերտ համագործակցության համար։

Ցանկանում եմ շնորհակալություն հայտնել մեր բարեկամներին ամենաբարձր մակարդակով ջերմ հյուրընկալության համար։

Այս տարի Ղրղզստանը նշում է իր անկախության 35-ամյակը, և ես կցանկանայի տարեդարձի կապակցությամբ, պարոն նախագահ, փոխանցել իմ անկեղծ շնորհավորանքները և մաղթել ձեզ և բարեկամ ղրղզ ժողովրդին խաղաղություն և բարգավաճում։

Ցանկանում եմ նաև օգտվել այս հնարավորությունից՝ արտահայտելու իմ երախտագիտությունը Վրաստանի տարածքային ամբողջականությանը և ինքնիշխանությանը անվերապահ և հետևողական աջակցության համար:

Հաշվի առնելով առկա քաղաքական և տնտեսական հարաբերությունները՝ Վրաստանը Ղրղզստանը համարում է ոչ միայն կարևոր և հուսալի գործընկեր, այլև բարեկամ պետություն։ Սա շատ ամուր հիմք ունի մեր ժողովուրդների և երկրների միջև հաստատված պատմական բարեկամության տեսքով։

Ընդլայնված ձևաչափով հանդիպման շրջանակներում մենք քննարկեցինք վրաց-ղրղզական համագործակցության լայն շրջանակ, ինչպես նաև տարածաշրջանային և համաշխարհային նշանակության հարցեր։

Երկկողմ հարաբերությունների օրակարգում գտնվող հարցերը քննարկելիս մենք կենտրոնացանք երկկողմ առևտրատնտեսական համագործակցության կարևորության և դրա հետագա զարգացման վրա։ Նշվեց, որ այս համագործակցությունն ունի զարգացման մեծ ներուժ», – ասաց Իրակլի Կոբախիձեն։