Իրակլի Կոբախիձե - Համաձայն եմ Հայաստանի վարչապետի գոհունակության հետ, որ Վրաստանի և Հայաստանի հարաբերություններն ավելի են զարգանում և ընդլայնվում
Վրաստանի վարչապետ Իրակլի Կոբախիձեի հայտարարության համաձայն, Վրաստանի և Հայաստանի բարեկամությունը գալիս է դարերի խորքից, և երկու երկրների միջև ստորագրված ռազմավարական գործընկերության մասին համաձայնագիրը փոխգործակցությունը տեղափոխեց որակապես այլ մակարդակ։
«Շնորհակալություն, պարոն վարչապետ։ Ողջունում եմ Հայաստանի և Վրաստանի կառավարությունների անդամներին և ներկայացուցիչներին, ողջունում եմ լրատվամիջոցների ներկայացուցիչներին։ Ինձ համար մեծ պատիվ է վարչապետի պաշտոնը ստանձնելուց անմիջապես հետո պաշտոնական այցով Հայաստանում լինելը։ Ցանկանում եմ շնորհակալություն հայտնել հյուրընկալության համար։ Մեր երկրների և մեր ժողովուրդների բարեկամությունը դարերի պատմություն ունի։ Ստորագրեցինք ռազմավարական գործընկերության համաձայնագիր, որը մեր համագործակցությունը տեղափոխեց որակապես այլ մակարդակ։ Այս հռչակագիրն առաջին հերթին ուղղված է երկկողմ համագործակցության խորացմանը, տարածաշրջանում խաղաղությանն ու կայունությանը նպաստելուն։ Հռչակագիրը հիմնված է մեր ընդհանուր արժեքների և սկզբունքների վրա, այն արտահայտում է մեր անսասան աջակցությունն այդ արժեքներին»,- ասել է Իրակլի Կոբախիձեն Հայաստանի վարչապետ Նիկոլ Փաշինյանի հետ համատեղ ճեպազրույցում։
Կոբախիձեի խոսքով, այսօրվա հանդիպմանը նա շնորհակալություն է հայտնել Նիկոլ Փաշինյանին՝ Վրաստանի տարածքային ամբողջականությանն ու ինքնիշխանությանը աջակցելու համար։
«Մեր երկրի անունից ևս մեկ անգամ հաստատեցի մեր երկրի անսասան աջակցությունը Հայաստանի տարածքային ամբողջականությանը և ինքնիշխանությանը։ Իհարկե, համաձայն եմ վարչապետի գոհունակության հետ, որ մեր հարաբերությունները երկու երկրների միջև դինամիկ զարգանում են և էլ ավելի են ընդլայնվում։ Զրույց ունեցանք մեր երկրների միջև համագործակցության տարբեր ասպեկտների, տարբեր հարթությունների, քաղաքական տեսակետից համագործակցության, առևտրի, տնտեսության, տրանսպորտի, զբոսաշրջության և այլնի մասին։ Շատ կարևոր է այս բոլոր ուղղություններով մեր գործընկերության հետագա զարգացումն ու խորացումը»,- ասել է Իրակլի Կոբախիձեն։
Բացի այդ, Իրակլի Կոբախիձեն Նիկոլ Փաշինյանին հրավիրել է Վրաստան։
«Պարոն վարչապետ, մեկ անգամ եւս թույլ տվեք իմ երախտագիտությունը հայտնել Ձեզ ջերմ ընդունելության համար։ Եվս մեկ անգամ ցանկանում եմ ձեզ հրավիրել Վրաստան։ Այս մասին մենք խոսեցինք հանդիպման ժամանակ։ Ուզում եմ ևս մեկ անգամ խնդրել ձեզ գալ Վրաստան։ Իհարկե, երկկողմ բարձր մակարդակի այցերը շատ կարևոր են մեր երկրների միջև բարձր մակարդակի հարաբերությունները պահպանելու, այն բարձր դինամիկան պահպանելու համար, որն այսօր բնորոշ է մեր գործընկերությանը։ Մեր խնդիրն է հզորացնել մեր երկրները, և մեր համագործակցությունը կարող է շատ կարևոր դեր խաղալ այս առումով»,- նշել է Իրակլի Կոբախիձեն։
