Eagle Hills-ի նախագծը իրականացվում է ընդհանուր շուրջ 850 հեկտար տարածքի վրա, որից Կռցանիսի տարածքը կազմում է մոտ 600 հեկտար, իսկ Գոնիոն՝ մոտ 250 հեկտար։ Այս մասին հայտարարել է Վրաստանի վարչապետ Իրակլի Կոբախիձեն՝ խորհրդարանում ինտերպելացիայի կարգով ելույթի ընթացքում։

Կառավարության ղեկավարը նշել է, որ շրջանառվում են բազմաթիվ սպեկուլյացիաներ, և քաղաքական կուսակցությունների տարբեր ներկայացուցիչներ ասում են, թե այս տարածքը Մոնակոյից չորս անգամ մեծ է։

«Չգիտեմ՝ նման սպեկուլյատիվ հայտարարություններով ում կարելի է ազդել։ Վրաստանում բոլորը լավ գիտեն, որ Մոնակոն այսպես կոչված թզուկ պետություն է, և դրանցից ամենափոքրը։ Իրականում՝ դա պարզապես շատ փոքր քաղաք է, և Մոնակոյի հետ համեմատությունը բացահայտ սպեկուլյացիա է։ Որպես ոչ սպեկուլյատիվ համեմատություն՝ ասեմ, որ օրինակ Կռցանիսիի բաժինը Թբիլիսիի տարածքի համեմատությամբ 120 անգամ փոքր է։ Մենք պետք է խուսափենք սպեկուլյացիաներից և կոչ ենք անում մեր ընդդիմախոսներին չփորձել նման պարզունակ ձևերով մոլորեցնել հասարակությանը հողամասերի վերաբերյալ», – ասել է Իրակլի Կոբախիձեն։