Այսօր մենք հուշագիր ստորագրեցինք, որը նախատեսում է վեց միլիարդ դոլարի աննախադեպ ներդրում մեր երկրում, – Աբու Դաբիում վրացի լրագրողներին ասել է վարչապետ Իրակլի Կոբախիձեն։

Նրա խոսքով, այս համաձայնագիրը առանձնահատուկ նշանակություն կունենա Վրաստանի տնտեսական զարգացման համար։

«Շատ հետաքրքիր հանդիպումներ ունեցանք Արաբական Միացյալ Էմիրություններում, առաջին հերթին հանդիպում ունեցանք Արաբական Միացյալ Էմիրությունների նախագահի, Աբու Դաբիի կառավարչի հետ, շատ հետաքրքիր հանդիպումներ ունեցանք նաեւ նախարարների ու կառավարության անդամների հետ։ Մենք քննարկել ենք երկրների հարաբերությունների տարբեր ասպեկտներ, քաղաքական համագործակցություն, բազմաթիվ քննարկումներ ունեցանք տնտեսական նախագծերի վերաբերյալ։ Բացահայտվել են կոնկրետ, շատ հետաքրքիր ուղղություններ, որտեղ մենք կարող ենք էլ ավելի խորացնել համագործակցությունը երկու երկրների միջև։ Հատկապես կարևոր է, որ այսօր ստորագրեցինք հուշագիր, որը նախատեսում է աննախադեպ ներդրում մեր երկրում՝ 6 մլրդ դոլարի ներդրում, որը Վրաստանում կիրականացնի ներդրումային ոլորտում բացառիկ փորձ ունեցող ընկերությունը՝ հայտնի EMAAR Group-ը։ Շատ հետաքրքիր նախագիծ կիրականացվի, սա բազմաֆունկցիոնալ զարգացման ծրագիր է, բազմաֆունկցիոնալ ենթակառուցվածքներ կզարգացվեն մի կողմից Թբիլիսիում, մյուս կողմից Բաթումիում, Գոնիոյում»,- ասել է վարչապետը։

Իրակլի Կոբախիձեի խոսքով, այս ամենը զգալիորեն կնպաստի երկրի տնտեսության զարգացմանը, էլ ավելի կարագացնի տնտեսական աճի տեմպերը, կստեղծի նոր աշխատատեղեր, և այս ամենն էլ ավելի կներգրավի երկիր այլ ներդրողների։

«Ցանկանում եմ շնորհակալություն հայտնել մեր գործընկերներին, ընկերներին, Արաբական Միացյալ Էմիրությունների կառավարությանը և EMAAR Group-ին, նրա ղեկավար պարոն Ալաբարին, որոնք բոլորն էլ հատկապես երախտապարտ են իրենց համագործակցության և այսօրվա համաձայնագրի համար, որը առանձնահատուկ նշանակություն կունենա մեր երկրի տնտեսական զարգացման համար»,- ասել է վարչապետը։