«Եվրոպառլամենտի որոշումը հստակ ցույց է տալիս, թե իրականում ինչ արժեք ունի ազատ մամուլը Եվրոպական միությունում»,— այս մասին Վրաստանի Առաջին ալիքին հայտնել է Վրաստանի խորհրդարանի տեղական ինքնակառավարման հարցերի հանձնաժողովի նախագահ Իրակլի Քադագիշվիլին։

Քադագիշվիլիի խոսքով՝ այնտեղ մուտք են գործում միայն այն լրատվամիջոցները, որոնք նրանց համար հարմարավետ միջավայր են ստեղծում։

«Ցանկացած քննադատական հարց անընդունելի է և, նրանց ըմբռնմամբ, պատժելի։ Սա պայքար է ազատ մամուլի և ազատ խոսքի դեմ։ Վրաստանում լրատվամիջոցների դեմ այս պայքարն ընդգրկում է բազմաթիվ տասնամյակներ։ Դրա լավագույն օրինակը «Ազգային շարժման» կառավարումն էր, երբ բոլոր հեռուստաընկերությունները ենթարկեցվեցին մեկ խմբագրական քաղաքականության, այդ թվում՝ ֆիզիկական ուժի կիրառմամբ։ Համարվում էր, որ դա օրինակելի վիճակ էր։ Այն ժամանակ Եվրոպառլամենտը արձագանք չուներ, քանի որ այն այսօր նույնպես այդ քաղաքականության իրականացնողն է։ Եվրոբյուրոկրատիային քննադատական հարցն անհանգստություն է պատճառում, ուստի այլ կերպ մտածող կամ սեփական խմբագրական քաղաքականություն ունեցող հեռուստաընկերությունը պետք է պատժամիջոցի ենթարկվի։ Սա քայլ է դեպի լիբերալ տոտալիտարիզմ»,— հայտարարել է Քադագիշվիլին։

Հիշեցնենք, որ Եվրոպառլամենտը մեկ տարով կասեցրել է «Իմեդի», «Ռուսթավի 2» և «Պոստտիվի» հեռուստաընկերությունների հավատարմագրումը։