Գուրիայում շատ լավ հանդիպում ունեցանք, հանդիպեցի կուսակցության ակտիվ անդամներին, մեր թիմի անդամներին։ Մենք գնում ենք բոլոր շրջաններ՝ կուսակցությունը պատրաստելու ընտրություններին, մենք պետք է շատ ուժեղ հաղթենք այս ընտրություններում»,- այս մասին ասել է «Վրացական երազանքի» նախագահ Իրակլի Ղարիբաշվիլին։

Ղարիբաշվիլիի խոսքով՝ իշխող թիմը ցանկանում է վերցնել սահմանադրական մեծամասնությունը։

«Մենք պետք է հաղթենք, որպեսզի երկիրը շարունակի իր խաղաղ, կայուն զարգացումը, որպեսզի թույլ չտանք մեր երկրի թշնամիներին ու երկրի ներսում գործող թշնամական ուժերին կասեցնել երկրի խաղաղ զարգացումը։ Գուրիայում շատ թույն տրամադրություն է, մեր հպարտ գուրիացիները մոտիվացված են այս ընտրություններում շատ ուժեղ հաղթելու։ Մեր հիմնական ուղերձն այն է, որ մենք պետք է կարողանանք հնարավորինս մոբիլիզացվել, որպեսզի մեր կուսակցությունը կարողանա վերցնել սահմանադրական մեծամասնությունը։ Սա է մեր հիմնական ուղերձը։ Մենք խոսեցինք այն մարտահրավերների մասին, որոնք այժմ կան երկրում և ամբողջ աշխարհում։ Շատ դժվար ժամանակ է, ես մեր թիմի անդամներին ասացի, որ այն սպառնալիքը, որ կար անցյալ և նախորդ տարի, նկատի ունեմ երկրորդ ճակատ բերելու սպառնալիքը, ոչ մի տեղ չի գնացել։ Ուստի անհրաժեշտ է երկիրը տանել դեպի խաղաղություն ողջամիտ, հանգիստ և հաստատակամ կերպով»,- ասել է Ղարիբաշվիլին։