Իրակլի Ղարիբաշվիլի. «Էնջեո»-ների ճնշող մեծամասնությունը դեմ է վրացական շահերին, նրանք աշխատում են վրաց ժողովրդի դեմ և կատարում օտարերկրյա պետությունների խնդիրները
Ես նկատի չունեմ բոլոր «Էնջեո»-ներին, բայց նրանց ճնշող մեծամասնությունը ուղղակիորեն դեմ է վրացական շահերին, նրանք ամեն օր աշխատում են պետության, վրաց ժողովրդի շահերի դեմ, կատարում են օտար երկրների խնդիրներն ու շահերը», – Այս մասին ասել է «Վրացական երազանք»-ի նախագահ Իրակլի Ղարիբաշվիլին։
Ղարիբաշվիլիի խոսքով՝ բոլորը լավ են հիշում, թե ինչպես են մի քանի «Էնջեո» մասնակցել արմատական գործողությունների։
«Դա ողբերգություն է, մանավանդ, որ մենք չգիտենք, թե ինչ են անում, ավելի ճիշտ գիտենք, բայց հանրությունը չգիտի, թե ինչ են անում «էնջեոները»։ Մենք շատ լավ գիտենք, թե ինչպես է այս կամ այն «Էնջեոն» մասնակցել ծայրահեղական, արմատական գործողություններին, իրենք մասնակցել այդ ծայրահեղական, արմատական գործողությունների կազմակերպմանը։ Հիշու՞մ եք, թե ովքեր էին կանգնած ԼԳԲՏ «Էնջեո» կազմակերպության, «Ազգային շարժման» հետևում, ովքեր էին նրանց ֆինանսավորողները և այլն։ Սրանք տրամաբանական հարցեր են ու այս հարցերի պատասխանները հենց այս «էնջեոները» պետք է տան։ Այս «էնջեոների» տաբուն պետք է վերացնել։ Տարիներ շարունակ հարձակվում են իշխանության, եկեղեցու, պատրիարքարանի վրա՝ բոլորի վրա, իսկ ի պատասխան, երբ մենք՝ հանրությունը հարցեր ենք տալիս, սա անընդունելի է, ոչ, կներեք, ընկերներ, ոչ մի կազմակերպություն չպետք է ծածկվի ու թաքնվի սրա մեջ»,- ասել է Ղարիբաշվիլին։