Մյունխենի անվտանգության համաժողովի շրջանակներում Վրաստանի արտգործնախարար Իլիա Դարչիաշվիլին հանդիպում է ունեցել ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ՛Բրայենի հետ։

Ինչպես հայտնում է ԱԳ նախարարության մամուլի ծառայությունը, քննարկվել են երկու երկրների ռազմավարական գործընկերության հարցերը։ Կողմերը մտքեր են փոխանակել տարածաշրջանային անվտանգության, Վրաստանի խաղաղության նախաձեռնության, օկուպացված տարածքներում տիրող իրավիճակի շուրջ։

«Նրանք խոսեցին հակամարտությունների կարգավորման խաղաղ քաղաքականության և այս գործընթացում միջազգային գործընկերների դերի մասին։ Ընդգծվել է ԱՄՆ-ի և Վրաստանի միջև ոլորտային հաջող համագործակցությունը, այդ թվում՝ միջազգային պարտավորությունների կատարումը, և այդ առումով նշվել է պարոն Օ’Բրայենի՝ անցյալ տարի Վրաստան կատարած հաջող այցը»,- ասվում է ԱԳ նախարարության մամուլի ծառայության հաղորդագրության մեջ։

Ըստ իրենց հաղորդագրության, կողմերը մտքեր են փոխանակել տարբեր ուղղություններով համագործակցության հետագա ամրապնդման ուղիների շուրջ։