Հայաստանն ու Ֆրանսիան աշխատում են ռազմավարական գործընկերություն հաստատելու ուղղությամբ։ Հայաստանի արտաքին գործերի նախարարության տվյալներով՝ ԱԳ նախարարի տեղակալ Վահան Կոստանյանն անցկացրել է բանակցություններ Ֆրանսիայի Եվրոպայի և արտաքին գործերի նախարարության մայրցամաքային Եվրոպայի վարչության ղեկավար Բրիս Ռոքֆելենի հետ։

Հայաստանի ԱԳՆ հաղորդմամբ, հանդիպման ընթացքում կողմերը մանրամասն քննարկել են Հայաստանի և Ֆրանսիայի միջև ռազմավարական գործընկերության հաստատման ուղղությամբ արված քայլերը։ Խորհրդակցությունների ժամանակ քննարկվել են երկու երկրների միջև պաշտպանական, տնտեսական, մշակութային և ենթակառուցվածքների ոլորտներում առկա համագործակցության ծրագրերը, ինչպես նաև դրանց զարգացման և ընդլայնման հեռանկարները։

Արտաքին գործերի նախարարության տեղեկատվությամբ՝ հանդիպման ընթացքում անդրադարձ է եղել նաև Հայաստան-ԵՄ գործընկերության օրակարգին։ Այս համատեքստում նշվել է Ֆրանսիայի դրական դերը այդ օրակարգի ընդլայնման և առաջխաղացման հարցում։