Թայմս օֆ Իսրայել-ի տեղեկություններով՝ Լիբանանում գործող Հեզբոլլահ խմբավորումը անօդաչու սարքերով հարձակում է սկսել Իսրայելի հյուսիսային հատվածի վրա։ Արդյունքում վեց մարդ վիրավորվել է։

Ինչպես հայտնում են իսրայելական լրատվամիջոցները, հենվելով «Նահարիա» բժշկական կենտրոնի տնօրենի վրա, վեց մարդ շարունակում է մնալ հիվանդանոցում։ Նրանցից մեկ տուժածի վիճակը ծանր է։

Իսրայելական լրատվամիջոցները հեռարձակում են նաև Հեզբոլլահի հարձակման տեսանյութը։

Հեզբոլլահը հաստատել է, որ անօդաչու սարքեր են արձակել Իսրայելի ուղղությամբ։ Խմբավորման անդամներն ասում են, որ իրենց թիրախը եղել է ռազմական ենթակառուցվածքը։ Սակայն Հեզբոլլահն ասում է, որ սա վրեժ չէր անցյալ շաբաթ Բեյրութում Իսրայելի հարձակման համար, որի արդյունքում սպանվել էր խմբավորման ռազմական հրամանատար Ֆուադ Շուքրին։

Մերձավոր Արևելքում իրավիճակը սրվեց այն բանից հետո, երբ Թեհրանում սպանվեց ՀԱՄԱՍ շարժման առաջնորդ Իսմայիլ Հանիեն, իսկ Բեյրութում լիկվիդացվեց Հեզբոլլահի բարձրաստիճան պաշտոնյա Ֆուադ Շուքրին։ Ի պատասխան՝ Իրանը սպառնացել է Իսրայելին պատասխան գործողություններով։ Ինչպես գրում են ամերիկյան լրատվամիջոցները, ամերիկյան հետախուզությունը ենթադրում է, որ Իրանից Իսրայելի վրա հարձակումների երկու ալիք է սպասվում։ Դրանցից մեկը կիրականացնի Լիբանանում Իրանի աջակցությամբ գործող «Հեզբոլլահ» խմբավորումը, իսկ մյուսը՝ Իրանը եւ նրա վստահված խմբավորումները։ Սակայն, ինչպես նշում են ամերիկյան լրատվամիջոցները, հետախուզությունը դեռևս տեղեկություն չունի, թե ով է առաջինը հարձակվելու Իսրայելի վրա և ինչ է նախատեսում անել Թեհրանը։

Անանուն աղբյուրները հայտնում են, որ Թեհրանի վրա հարձակման ծրագրերը դեռ մշակման փուլում են։ Տեղեկության համար նշենք, որ անցյալ շաբաթ ԱՄՆ-ը ռազմական ինքնաթիռների և լրացուցիչ ռազմանավերի էսկադրիլիա ուղարկեց Մերձավոր Արևելք՝ նկատի ունենալով Իրանի կողմից Իսրայելի վրա սպասվող հարձակմանը։