ՀՀ վարչապետ Կարեն Կարապետյանը նախագահ Արմեն Սարգսյանին է ներկայացրել կառավարության հրաժարականի դիմումը: Հանրապետության նախագահն ընդունել է կառավարության հրաժարականը:
Կառավարության անդամները կշարունակեն իրենց պարտականությունների կատարումը մինչև նոր կառավարության կազմավորումը:
Սահմանադրության համաձայն, Հանրապետության նորընտիր նախագահի պաշտոնը ստանձնելու օրը Կառավարությունը ներկայացնում է իր հրաժարականը:
Յոթնօրյա ժամկետում ԱԺ խմբակցությունները կներկայացնեն վարչապետի իրենց թեկնածուներին։
Վարչապետն ընտրվում է պատգամավորների ընդհանուր թվի ձայների մեծամասնությամբ՝ բաց քվեարկությամբ։
Ապրիլի 17-ին տեղի կունենա վարչապետի ընտրություն, ինչից հետո հնգօրյա ժամկետում հանրապետության նախագահին կներկայացվեն կառավարության անդամների թեկնածուները, իսկ 15-օրյա ժամկետում պետք է կառավարության անդամների 2/3-ը նշանակված լինեն:
Նոր Սահմանադրության համաձայն՝ Կառավարությունն ունենալու է առաջին փոխվարչապետ, 2 փոխվարչապետ և 18 նախարար:
