Համաճարակից հինգ տարի անց Առողջապահության համաշխարհային կազմակերպությունը կոչ է արել Չինաստանին հրապարակել կորոնավիրուսի ծագման տվյալները
Covid-19 համաճարակից հինգ տարի անց Առողջապահության համաշխարհային կազմակերպությունը կոչ է արել Չինաստանին հրապարակել վիրուսի ծագման տվյալները։
Ինչպես նշվում է Առողջապահության համաշխարհային կազմակերպության հայտարարության մեջ, «սա բարոյական և գիտական հրամայական է»։
«Առանց թափանցիկության, տեղեկատվության փոխանակման և երկրների միջև համագործակցության, աշխարհը չի կարողանա պատշաճ կերպով նախապատրաստվել և կանխել ապագա համաճարակները», – ասվում է կազմակերպության հայտարարության մեջ։
Ինչպես գրում է «BBC»-ն, շատ գիտնականներ կարծում են, որ վիրուսը կենդանիներից մարդուն է փոխանցվել բնական ճանապարհով, թեև ոմանք դեռ կասկածում են, որ այն տարածվել է Ուհանի լաբորատորիայից։
Ի պատասխան Առողջապահության համաշխարհային կազմակերպության կոչին՝ Չինաստանի ԱԳՆ-ն ասել է, որ միշտ բաց է համագործակցության համար և համաճարակի հենց սկզբում կազմակերպության հետ կիսվել է վիրուսի մասին տեղեկատվությամբ։
Տեղեկատվության համար, Առողջապահության համաշխարհային կազմակերպությունը 2023 թվականի մայիսին հայտարարեց, որ Covid-19-ն այլևս «գլոբալ առողջապահական արտակարգ իրավիճակ» չէ։ Կազմակերպության գլխավոր տնօրեն Թեդրոս Ադհանոմ Գեբրեյեսուսն այն ժամանակ ասաց, որ առնվազն յոթ միլիոն մարդ մահացել է համաճարակի ժամանակ: Այնուամենայնիվ, նա ավելացրեց, որ իրական զոհերի թիվը, հավանաբար, ավելի մոտ է 20 միլիոնին: