«Թողեք Սինոդին, թողեք այն մարդկանց, ովքեր ծառայում են Պատրիարքարանում. Սինոդը կանցկացվի հանդարտ, և ում կընտրեն, նա էլ կլինի Պատրիարքը», – հայտարարել է «Ժողովրդի ուժը» կուսակցության գործադիր քարտուղար Գուրամ Մաճարաշվիլին։

Նրա խոսքով՝ «Ազգային շարժումը» և օտարերկրյա ուժերը փորձում են պառակտում մտցնել եկեղեցում։

««Ազգային շարժմանը», նրա ՀԿ-ներին և օտարերկրյա ուժերին մինչև վերջ ո՛չ Պատրիարքարանն էր հետաքրքրում, ո՛չ էլ եկեղեցին. ընդհակառակը՝ վիրավորում էին, հայհոյում։ Ասում էին՝ «խավարամտություն է», «այնտեղից քաղաքակրթություն չի գալիս» և այլն։ Հիմա հանկարծ դա դառնում է հետաքրքրության ոլորտ, թե ինչ տեղի կունենա Սինոդի նիստին։ Ընդհանրապես, ե՞րբվանից են հետաքրքրվել, թե ինչ է կատարվում Սինոդում, կամ ինչ է գրված կառավարման կանոնադրության մեջ, կամ ապագայում ինչ կլինի եկեղեցում։ Ինչո՞ւ հետաքրքրվեցին, չէ՞ որ սկզբից մինչև վերջ ասում են, թե այնտեղ խավար է և այլն։ Այ հենց դրա համար էլ հետաքրքրվեցին, որովհետև ուզում են ինչ-որ կերպ պառակտում մտցնել եկեղեցում. սա այլ բացատրություն չի կարող ունենալ։ Այս մարդիկ, ովքեր հանդես են գալիս և իբր հոգում են ապագա եկեղեցական հարաբերությունների մասին, հայհոյում էին եկեղեցուն և ասում, որ սկսած Պատրիարքից, վերջացրած հոգևորականներով՝ նրանցից ոչ մի քաղաքակրթական բան չի գալիս։

Հիմա, որ հետաքրքրվում ես, թե այնտեղ ինչ է կատարվում, նշանակում է, որ դու ուզում ես այնտեղ որոշակի պառակտում մտցնել։ Թողեք Սինոդին, թողեք այն մարդկանց, ովքեր ծառայում են Պատրիարքարանում. Սինոդը կանցկացվի հանգիստ, հանդարտ, և ում կընտրի Սինոդը, նա էլ կլինի Պատրիարքը», – հայտարարել է Մաճարաշվիլին։

Լրագրողի հարցին, թե արդյոք հետաքրքրված է, թե ով կարող է լինել ապագա Պատրիարքը, Մաճարաշվիլին նշել է, որ շահագրգռված է, որ եկեղեցում շարունակվի այն ուղղությունը, որն ուներ Իլիա Երկրորդը։

«Իմ հետաքրքրությունն այն է, որ Սինոդում, ինչպես և ամբողջ եկեղեցում, շարունակվի այն ուղղությունը, որն ուներ Պատրիարքը։ Սա ոչ միայն իմ, այլև հավատացյալների շահն է, և այն հետաքրքրությունը, որն ուներ Պատրիարքը, նա արտահայտել է դեռևս կենդանության օրոք։ Մենք լսում ենք մանիպուլյացիաներ, թե Պատրիարքը սա չի ասել կամ այն չի ասել։ Մոտ ութ տարի առաջ նա շատ հստակ ասաց, թե ում է ուզում տեսնել որպես տեղապահ, և, համապատասխանաբար, այս տարիների ընթացքում շարունակում էր իր դիրքորոշումը», – հայտարարել է Մաճարաշվիլին։