«Լելո – Ուժեղ Վրաստանի» առաջնորդներից Գրիգոլ Գեգելիան չի հաստատում և չի հերքում տարածված տեղեկությունը, թե կուսակցության քաղաքապետի թեկնածուներից մեկը կարող է լինել երգիչ Մերաբ Սեֆաշվիլին։

Գրիգոլ Գեգելիայի խոսքով՝ «Լելո – Ուժեղ Վրաստանը» ունի ուժեղ թեկնածուներ, և ներկայում ընթանում են խորհրդակցություններ, որոնց արդյունքում կընտրվի ամենահարմար թեկնածուն։

«Չեմ կարող ոչ հաստատել և ոչ էլ հերքել։ Մենք շատ լավ թեկնածուներ ունենք, և նրանցից ամենալավին կընտրենք։ Ինչպես հանրությանը հայտնի է, մենք հարցում ենք իրականացնում, և շատ շուտով այդ հարցումների ու խորհրդակցությունների արդյունքում կընտրենք այն անձին, որը մեր կարծիքով ամենահարմարն է։ Չեմ քննարկի և չեմ կարող քննարկել որևէ կոնկրետ թեկնածուի։ Ունենք շատ ուժեղ թեկնածուներ, արժանապատիվ մարդիկ», — ասել է Գրիգոլ Գեգելիան։

Նրա խոսքով՝ «Լելո – Ուժեղ Վրաստանի» ծրագիրը պայքարելն է։

«Պայքարը միշտ, ցանկացած անարդարության դեմ և ցանկացած անարդարության պայմաններում։ Չեմ հիշում, թե վերջին անգամ երբ է այս երկրում արդար պայքար եղել։ Միայն 1919 թվականն եմ հիշում, դրանից հետո շատ քիչ եմ հիշում արդար պայքար, ազատ ընտրություններ։ Երևում է՝ ուրիշների հիշողությունը լավն է, և նրանց շարժում է ինչ–որ այլ հարմարավետության սպասում։ Մեզ ոչինչ չի շարժում։ Մենք գիտենք, որ եթե չպայքարենք, ոչինչ չի լինի», — նշել է Գրիգոլ Գեգելիան։